Kampuang Kalawi, Lubuak Lintah, Kuranji, Padang

Kampuang Kalawi, Lubuak Lintah, Kuranji, Padang adolah kawasan nan rami jo strategis di Kelurahan Lubuak Lintah, Kecamatan Kuranji, Kota Padang. Kawasan iko rami dek patokoan jo urang manggaleh. Di kawasan iko, ado mini market, toko listrik, pakaian, sapatu, jo masih banyak nan lain. Kawasan iko strategis dek aseksnyo langsuang jo jalan gadang. Jalan iko tahubuang ka kampuang Ampang jo Alai ka arah timur sarato kampuang Hilalang ka arah barat.

Sejarah

Asa usul

Namo daerah iko marujuak kapado tando alam nan manjadi ciri khusus untuak mambedoannyo jo kampung nan lain. Manuruik Irwan Munir St. Rajo Bungsu, masyarakaik satampek, namo Kampuang Kalawi barasa dari duo kato, iyolah "kampuang" jo "kalawi". Kampuang bararti tampek kadiaman masyarakat, samantaro kalawi adolah pohon gadang nan tumbuah di sinan. Pohon iko takah pohon cubadak gadang, buahnyo biaso dubuek urang untuak sayuran sarato gorengan.

Dalam tinjauan semantik, arati kalawi indak lai dipahami jo konsep denonatif atau kato sabananyo, malainkan manganduang arati referensial.  Mukasuiknyo, Kalawi sabagai namo pohon indak lai dikenal dek masyarakaik nan mauni kampuang Kalawo dikaranoan pohon itu indak ado lai di sinan.

Parjuangan kamardekaan

Kampuang Kalawi pernah manjai markas utama Polisi Bantuan, nan disingkek jadi PB, dibantuak dek pimpinan polisi RI untuak mambantu kapolisian RI malakukan tugas-tugas untuak manjago kaamanan masyarakaik Kota Padang dari babagai ancaman nan datang dari pihak Sekutu/NICA. Personel PB dipabantuan di babagai kantua polisi di Sumatera Barat., tamasuak di lua Kota Padang.

Salain itu, Kampuang Kalawi dulu manjai jalan rintisan pajuang manuju Kampuang Kalumbuak nan manjadi basis partahanan nan cukuik pantiang dek karano di siko ado markas gabuangan kasatuan laskar.

Geografi

Di Kampuang Kalawi iko mangalir sabuah batang aia, atau sungai nan cukuik gadang alirannyo taruih sampai ka Gunuang Pangilun nan bamuaro di Tabiang. Aia batang iko cukuik janiah sahinggo kamudian dimanfaatkan sabagai sumber aia minum PDAM Kota Padang maso kini. Indak hanyo itu, sungai iko mampu mangasilkan bahan material untuak pondasi bangunan barupa batu jo kasiak dalam jumlah nan cukuik banyak. Kondisi sungai iko kini alah maleba dek acok digali untuak mandapekan bahan material.

Kebudayaan

Dari sisi budaya, Kampuang Kalawi populer jo paguruan sileknyo nan banamo Kuciang Lia. Pandiri sakaligus guru paguruan iko adolah Safripiri gala Rajo Bujang nan barasa dari niniak mamak di Kampuang Kalawi. Paguruan iko tagak pado taun 1989. Indak hanyo basilek, paguruan iko maajaan murik-muriknyo jo ilmu agamo.