Kacimuih

Kacimuih adolah makanan khas Minangkabau nan tabuek dari ubi parancih nan diparuik aluih-aluih sarupo mamaruik keju. Sudah tu dibantuak sadamikian rupo tu dikukuih di dalam dandang. Sampai nyo ampuak dan satalah tu disiram jo kuah gulo saka nan alah dididiahkan tu, salanjuiknyo ditaburi karambia nan dikukua dan dicampua jo garam, tu taburi di ateh kacumuih tadi. Papaduan antaro manih jo guriah sarato jo ampuaknyo parancih tadi mambuek kacimuih ko manjadi lamak untuak dimakan.

Kacimuih saka

Kacimuih batabua gulo pasia

Kacimuih ko biasonyo di masak di hari-hari biaso sabagai sajian atau biaso ditamui juo di pasa-pasa tradisional. Salain mudah ditamui, kacimuih ko indak pulo payah mancari bahannyo jikok awak nio mambueknyo. Baitu pulo kacimuih ko sarasi bana untuak urang nan suko jo makanan nan manih-manih tapi taraso guriahnyo.

Resep

Bahan-bahan

• 6 buah parancih nan sadang elok gadang nyo tu
• 3 buah gulo saka merah, sudah tu
• 1/2 kapiang karambia nan alah di kukua aluih
• 10 gram garam aluih, sarato
• sahalai daun pandai aluih

Caro mambuek

Ambiak 6 buah parancih tadi lalu dikubak kuliknyo, satalah tu basuah parancih tadi jo aia barasiah sahinggo tabuang sagalo kotoran nan ado. Sasudah tu paruik parancih tadi sahinggo aluih-aluih manyarupoi keju. Lalu bantuak parancih nan lah diparuik aluih tadi manjadi bulek. Sudah tu masuakan parancih tadi ka dalam dandang tu, kukuih parancih tadi sahinggo nyo manjadi lunak.

Angekan aia di ateh kompor tu masuakkan gulo saka nan alah disadiokan tadi. Sudah tu tunggu gulo saka tadi manjadi cair sahinggo nyo babantuak kuah. Satalah tu kukua karambia tadi sahinggo nyo manjadi aluih, sudah tu campua jo garam aluih tadi. Satalah tu angkek parancih nan alah ampuak tadi, siram jo kuah gulo saka, sudah tu taburi jo karambia aluih nan guriah di atehnyo.