Islam di Bali

Islam di Bali marupoan agamo minoritas nan dianuik dek 520.244 jiwa atau 13,37% dari 3.890.757 jiwa panduduak Bali. Paliang banyak umaik Islam di Bali tingga di Kota Denpasar nan bajumlah labiah dari 200 ribu jiwa.

Musajik di Kuta, Bali

Islam masuak ka Bali dipakiroan pado abaik ka-13 dan 14 malalui Karajaan Gelgel, tapi alun ado panalitian nan pasti. Panalitian tantang asa mulo Islam di Bali masih taituang langka. Sungaik sulik mandapekan sumber tatulih manganai sijarah masuaknyo Islam ka pulau Bali partamo kali. Tapi sabagaian sijarawan malacak kabaradoan Islam di Bali malalui tradisi lisan dan adonyo babagai komunitas Islam nan ado di babagai daerah di Bali. Malalui panalitian di babagai komunitas muslim di Bali dapek dikatahui bilo Islam mulai memasuaki daerah tasabuik, antaro lain malalui panalitian musajik-musajik tuo nan dibuek dan makam-makam kuno dari pamuko Islam di daerah tasabuik nan kini dikana juo jo sabutan Wali Pitu dari Bali.

Sijarah

Islam masuak ka pulau Bali sajak jaman kajayaan Karajaan Majapahit pado sakitar abaik XIII dan XIV Masehi. Katiko itu rajo Gelgel partamo, Dalem Ketut Ngelesir (1380-1460 M) maadoan kunjuangan ka keraton Majapahit untuak basobok jo Rajo Hayam Wuruk. Katiko itu Rajo Hayam Wuruk sadang maadoan konferensi karajaan saluruah Nusantara. Konferensi tu marupoan konferensi tahunan basamo karajaan bawahan nan ado di babagai daerah Indonesia.

Salain itu sabagai bantuak kepatuhan tahadok Karajaan Majapahit nan ado di Mojokerto. Salapeh acara tasabuik salasai, Dalem Ketut Ngelesir pulang ka Bali. Sabaliaknyo Dalem Ketut Ngelesir ka karajaannya dianta dek 40 urang dari Majapahit sabagai pangiriang, duo diantaranyo adolah Raden Modin dan Kiai Abdul Jalil basamo 40 urang pangiriang dari Majapahit. Para pangawal muslim itu hanyo batindak sabagai abdi dalam Karajaan Gelgel. Sasampai tibo di Gelgel nyo mandirian tampek pamukiman jo mambangun musajik nan diagiah namo Masjid Gelgel, nan kini marupokan tampek ibadah umaik Islam tatuo di Bali. Kajadian iko dijadian sabagai patokan masuaknya Islam di Bali nan bapusek di karajaan Gelgel Bali.

Raden Modin jo Kiai Jalil iko cukuik lamo tingga di pusek Karajoan Gelgel Klungkung. Tapi dalam pakambangan kaduonyo maninggaan Gelgel manuju ka arah timur dan baranti di desa Banjar Lebah. Di Banjar Lebah iko, Raden Modin tingga lamo dan indak malanjuikan pajalanan, tapi Kiai Jalil manaruihan pajalanan sampai di desa Saren inggo dan pado akhianyo maningga di desa tasabuik. Inyo maninggaan tulisan mushaf Al-Qur'an jo sabuah bedug nan kini kondisinyo alah mangalami karusakan.

Sajak itu umaik Islam mulai ado pangikuiknyo. Raden Modin dan Kiai Abdul Jalil buliah marupoan duo urang tokoh atau wali nan partamo kali manyebakan agamo Islam di pulau Bali. Makamnyo inggo kini banyak dikunjuangi umaik Islam untuak baziarah.

Komunitas asali

Ado babarapo komunitas asali Bali nan baragamo Islam yaitu:

1. Komunitas di Banjar Lebah, Saren Jawa di desa Budakeling, Kabupaten Karangasem
2. Kepaon dan Kelurahan Serangan di wilayah Kota Denpasar
3. Kampuang Pegayaman di Kabupaten Buleleng
4. Kampuang Loloan di Kabupaten Jembrana

Arsitektur

Pambangunan musajik di Bali sajak abaik XIV hinggo kini mangalami akulturasi jo unsua arsitektur tradisional Bali atau manyarupoi stil wantilan. Akulturasi duo unsua seni nan diwujuikan dalam pambangunan musajik manjadikan tampek suci umaik Islam di Bali tampak babeda jo bangunan musajik di Jawa ataupun daerah lainnyo di Indonesia.

Caliak pulo

• Masjid Agung Jamik Singaraja
• Masjid Al-Muhajirin Kepaon