Henrietta lacks
Henrietta "Hennie" Lacks (namo lahia Loretta Pleasant; 1 Agustus 1920-4 Oktober 1951) iolah seorang padusi afrika-amerika nan sel kankernyo manjadi sumber lini sel HeLa, sel kanker manusia pertamo nan abadi, jo termasuak ka dalam lini sel kanker nan paliang banyak ditaliti guno pangambangan panalitian dunia medis hinggo saat iko.
Potongan lini sel kanker Henrietta dibiopsi indak ado parsatujuan baliau jo kaluarganyo saat dalam maso pangubekan kanker serviks di Rumah Sakik Johns Hopkins di Baltimore, Maryland, A.S. pado tahun 1951 nan marupokan satu-satunyo rumah sakik paliang dakek dari tampek tingganyo nan lai manarimo pasien ras kulik hitam pado era segregasi ras di A.S. nan masih kental jo rasisme wakatu itu. Sel iko kudian dibudidayokan jo George Otto Gey, kudian dinamoi lini sel HeLa nan masih ditaliti di bidang medis sampai saat iko. Namun, salamo itu indak ado parsatujuan dari pasien dan kaluarga pasien katiko sel tasabuik diambiak untuak ditaliti, bahkan indak ado kompensansi untuak kaluarga pasien.
Walau ado sagalintia informasi mangenai mulo lini sel abadi HeLa di kalangan panaliti medis pado 1970, tapi kaluarga Lacks baru tau katiko tahun 1975. Hinggo kamudian hal iko maningkekan kesadaran soal privasi pasien dan hak pasien dalam panggunoan lini sel HeLa nan alah digunokan untuak panalitian dan komersil.
Biografi suntiang
Maso Ketek suntiang
Henrietta "Hennie" Lacks lahia jo namo Loretta Pleasant pado 1 Agustus 1920 di Roanoke, Virginia, A.S. dari mandenyo banamo Eliza Pleasant (née Lacks) (1886-1924) dan abaknyo banamo John "Johnny" Randall Pleasant (1881-1969). Henrietta diingek mampunyoi warno mato hazel, pinggang rampiang, sapatu ukuran 6 (Ukuran US 6 = ukuran EU 36 = 8.75 inchi = 22.5 cm)[1], suko mamakai kutek warno merah jo suko mamakai rok span lipek. Keluarganyo kurang yakin mulo parubahan namo Loretta manjadi Henrietta, dan sadari ketek alah dipanggia Hennie. Katiko Henrietta barumua ampek tahun pado 1924, mandenyo maningga saat malahiaan anak ka sapuluah. Dek kapayahan manggadangan anak kalau surang sajo salapeh bininyo maningga, abaknyo Henrietta mambaok anak-anaknyo pindah ka Clover, Virginia, A.S. di ma anak-anaknyo dibagi untuak digadangan jo famili di sinan. Henrietta akhirnyo digadangan jo Thomas "Tommy" Henry Lacks nan marupokan akeknyo dari pihak mande, dan tingga di rumah kabin kayu balantai duo nan dahulu tampek tingga budak nan karajo di ladang kabun kapunyoan akek buyut jo om buyutnyo Henrietta nan ras kulik putiah. Di sinan nyo babagi kamar jo sapupu nan baumua sambilan tahun (amak kaduonyo basaudara) banamo David "Day" Lacks (1915-2002) nan kudian jadi lakinyo.
Maikuikan karajo kabanyakan sanak familinyo nan tingga di Clover, Henrietta ikuk batani dan bakureh di ladang tembakau dari ketek. Henrietta masuak sakolah khusus urang kulik hitam nan balokasi duo mil (3,2 KM) dari tampeknyo tingga sampai akhirnyo putuih sakolah di kalas anam supayo bisa bakureh untuak kaluarganyo. Pado 1935, katiko baumua 14 tahun Henrietta malahiakan Lawrence Lacks anak laki-laki partamonyo, di 1939 anak padusinyo Elsie Lacks (1939-1955) lahia. Kaduonyo baabak Day Lacks. Elsie mandarito epilepsi jo cerebral palsy sayangnyo dicap "balain" atau "kopok jo pakak" dek kaluarganyo.