Wikipedia

Gareja Memorial Stanford

Gareja Memorial Stanford (disabuik juo MemChu) adolah gareja nan talatak di kompleks kampus Universitas Stanford, Kalifornia, Amerika Serikat.[2] Gareja ko dibangun dek Jane Stanford untuk mangana lakinyo, Leland, nan alah maningga. Arsitektur gareja ko dirancang dek arsitek Charles A. Coolidge nan maagiah gala gareja ko sabagai "mangkuto paramato arsitektur universitas".[3]

Gareja Memorial Stanford
MemChu
Stanford Memorial Church
LokasiMain Quad, Universitas Stanford, Kalifornia, Amerika Sarikat
DenominasiNondenominasi
Arsitektur
StatusGareja kampus
GayaRomanesque, Bizantium
Palatakan batu partamo1899 (1899)
Salasai1903 (1903)
Spesifikasi
Panjang128 meters (420 ft)
Jumlah manaro2
Tinggi manaro69 meters (226 ft)
Lonceang10
Namo resmi: Cathédrale Notre-Dame de Paris
JinihCathédrale
Ditatapkan1862[1]
PA00086250

Pambangunan Gareja Memorial Stanford disatujui dek pimpinan yayasan pado taun 1898 nan mulai baroperasi pado taun 1903. Gareja ko mamakai arsitektur Romanesque jo Bizantium nan tainspirasi dari gareja-gareja nan ado di Venezia. Pado dindiang-dindiangnyo tapajang mozaik-mozaik kaco sarato lukisan-lukisan religi. Gareja ko juo mampunyoi limo organ pipa nan dapek dipakai dek musisi gareja untuak baragam jinih musik rohani.[4]

Gareja Memorial Stanford marupokan gareja nan indak taafiliasi jo gareja atau aliran Kristen manopun, sarato nan manjadi nan paliang gadang di antaro gareja-gareja sarupo di Pantai Barat Amerika Serikat. Gareja ko juo dibangun untuak manyaimbangkan kabutuahan duniawi sarupo ilimu pangatauan jo kabutuahan rohani.[5][6]

Sijarah

suntiang
 
Bangunan asali sabalun gampo 1906.

Gareja Memorial Stanford diprakarsai dek Jane Stanford untuk mangana lakinyo, Leland Stanford, nan alah maningga pado 1893. Dek dirinyo nan agamis, gareja dibangun di tangah-tangah kampus sainggo nampak dari sadoalah panjuru kampus sarato manjadi pusek paratian di Komples Universitas Stanford. Gareja ko ditagakan untuak maagiah kasempatan untuak mahasiswa supayo dapek tabina imannyo sairiang pandidikannyo. Sajak mulo pambangunannyo, gareja ko ditujukan supayo dapek dipakai sadoalah aliran Kristen (nondenomination).[7][5]

Sabalun Leland Stanford maningga, inyo jo Jane Stanford panah bakunjuang ka Venezia basuo jo Maurizio Camerino pado taun 1890. Camerino adolah seniman mozaik kaco. Dek kaahliannyo tu, Camerino ditunjuak dek Jane Stanford untuak mambuek mozaik untuak garejanyo. Panunjuakannyo disatujui dek komite yayasan pado taun 1898. Dalam panantuan detil-detil gareja, Stanford dilibaikan dalam satiok panantuannyo inggo Gareja Memorial Stanford dapek manyamoi gareja-gareja Eropa abaik patangahan nan disukoinyo.[8][9]

Pambangunan gareja dimulai jo palatakan batu partamo pado Mei 1899 inggo kontruksinyo dimulai pado Januari 1900. Pada 25 Januari 1903, Gareja Memorial Standord partamo kali maagiah palayanan. Palayanan partamo ko dirayokan jo alek nan mamikek, utamonyo dalam manyumarakaan sumangek ekumenisme nan dicito-citokan Jane Stanford. Dimulai jo pambacoan palajaran Alkitab partamo dek Rabi Jacob Voorsanger dari Sidang Emanu-El San Fransisco, dilanjuikan jo kabaktian partamo jo khutbah dari Pastor Heber Newton sarato kabaktian kaduo jo khutbah dari Pandito D. Charles Gardner. Di salo-salo kabaktian, diadokan pulo pambaptisan.[10][11][12]

 
Plakat nan dilakekan baliak ka dindiang gareja sasudah gampo 1906.

Pado taun 1906, sataun sasudah Jane Stanford maningga (1905), gareja dihoyak gampo. Banyak bagian gareja dan cayia dek gampo. Dindiang-dindiang gareja banyak nan ratak jo rabah. Manaro jam gareja maalami karusakan parah, sainggo indak dapek dipeloki baliak.[13] Kini bagian minaro digantian jo ruang bagobah. Jam menara nan masih bisa dipakai disalamaikkan jo dipindahkan ka minaro jam nan baru di bagian lain dari kampus.[14] Bagian tangah gareja tapisah jo bagian lain gareja sainggo manyisokan ruang kosong indak baratok. Runtuahan-runtuahan bangunan juo marrusak mozaik sarato dindiang marmar altar gareja.[15][16][17][18]

Gareja manjadi bangunan kampus nan diutamokan untuak dipelokkan basamo Gaduang Kimia Lamo di kompleks dalam kampus. Gareja manjadi prioritas dek perannyo nan manjadi kasatuan identitas jo kampus nan jolong gadang ko. Pamelokannyo dimulai pado taun 1908. Mozaik-mozaik nan ancua pun mulai dipelokan katiko Camerino mamareso karusakannyo pado taun 1913.[13][17][19][20]

Pado taun 1989 gareja rusak pulo baliak dek dihoyak gampo Loma Prieta. Walau indak sakareh gampo taun 1906, gareja tatap maalami karusakan nan bapotensi samakin cayia kok tajadi gampo baliak.[17] Dek karusakan ko mambuek mozaik-mozaik gareja murah dicilok, walau dibaliakan juo di kudian ari sacaro diam-diam. Pado taun 1992 digalang dana untuak mamelokan baliak bagian gareja nan rusak.[17] Pihak yayasan kampus manyewo tim kontraktor, insinyur, arsitek, jo ahli konservasi untuak marancang renovasi nan labiah tahan gampo sarato maabihan dana sabanyak $10 juta.[21][17]

Arsitektur

suntiang
 
Gareja Memorial Stanford di kalo malam
 
Detil-detil fasad jandela ateh

Gareja Memorial Stanford adolah bagian dari kompleks utamo Universitas Stanford nan mambantuak area Quad nan konsepnyo manyarupoi arsitektur Eropa daripado Amerika pado umumnyo. Gareja ko dibangun samaso Pambaruan Amerika (Renaisans Amerika). Gareja ko mamadukan unsur-unsur seni Renaisans, Bizantium, jo Abaik Patangahan.[22][23]

 
A=Altar, B=Mimbar, C=Crossing, D=Nave, E=Lorong, F=Vestibule, G=Arcade, H=East Transept with Transept Gallery above, J=West Transept/Side Chapel with Transept Gallery above, K=Biliak Bunda

Rancangan desain asali gareja jo ampia sadoalah bangunan universitas dibuek pado taun 1886 dek arsitek Henry Hobson Richardson. Katiko inyo maningga, parancangannyo disalasaian dek Charles A. Coolidge.[24] Sasudah Jane Stanford manyalasaian status hukum ateh Universitas Stanford, inyo manyewo arsitek Clinton E. Day untuak maninjau jo mampabarui cetak biru gareja jo bimbiangan Charles E. Hodges. Kudian inyo mampakarajokan John McGilvray sabagai kontraktor gareja.[13]

Minaik Jane Stanford jo kamajuan sarato agamo tacamin dalam panantuan unsur-unsur seni klasik nan tapajang di gareja. Jane turuik dalam manantukan lukisan sarato mozaik gareja nan manggambarkan carito-carito dalam alkitab. Salain itu, Jane juo manaruah paratian pado urusan kamanusiaan sarato pasamoan gender. Manuruik sijarawan Willis L. Hall, gareja ko mamuek panggambaran padusi nan labiah banyak daripado gareja-gareja lain nan ado pado maso itu.[25][26]

Gareja ko mampunyoi struktuk babantuak salib. Pado struktur asalinyo, bangunan ko barukuran panjang 58 meter jo leba 46 meter sarato ado minaro jam jo ganto satinggi 24 meter.[13] Fasad maadok ka alun-alun utamo kampus (Inner Quad) nan taubuang ka bangunan-bangunan lain. Pintu masuaknyo malalui ruang vestibule atau narthex nan marupokan ruang ketek malintang sabalun masuak ruang utamo gareja (nave). Pado ruang utamo ko ado ciek lorong di tangah untuak jalan ka altar, sarato duo lorong sampiang. Sabalun ruang altar, ado ruang crossing atau ruang salib dek bantuaknyo cando titiak pasilangan salib. Ruang salib ko babantuak segi ampek nan manopang minaro tangah nan ditutuik jo atok babantuak gobah gadang nan randah. Ado langkuangan tinggi bagaya Romanesque nan mamisahkan ruang salib jo nave, trancept, sarato ruang mimbar garek. Ruang trancept (nan dikaduo sisi crossing) jo ruang mimbar (ruang manjadi tampek khutbah jo altar barado) bantuaknyo malangkuang satangah lingkaran di ujuangnyo. Antaro ruang salib jo mimbar tapisah jo janjang saketek. Ado ruang tambahan nan disabuik biliak bunda nan ditambahkan pado taun 1902 dek arsitek Clinton Day.[27]

Organ

suntiang
 
Kasing kayu jo pipa-pipa logam dari duo organ paliang gadang, yaitu Murray Harris jo Fisk-Nannet.

Gareja Memorial Stanford mampunyoi limo buah organ.[28] Partamo kali gareja ko mampunyoi organ yaitu pado taun 1901 dan dinamoi Murray Harris, manuruik nan pambueknyo, nan dilatakkan di galeri ateh dan masih bapakai inggo kini. Gampo pado taun 1906 marusak organ dan dipeloki pado taun 1925, dipagadang pado 1933, dan ditampekkan baliak pado 1996. Organ ko mampunyoi tigo papan tombol (keyboard) manual, 57 stop, sarato labiah dari 3.700 pipa.[28][note 1][30]

Organ barikuiknyo banamo organ The Fisk-Nanney, nan dianggap sabagai organ paliang rancak di dunia. organ ko dibuek pado taun 1985 dan dilatakkan juo di ruang galeri ateh. Organ ko dinamoi manuruik namo pambueknyo C. B. Fisk jo namo organis (urang nan mamainkan organ) gareja alah mangabdi 39 taun Herbert Nanney. Mulai dibuek pado taun 1973 dan tasusun dari ampia 4.500 pipa.[31][30]

Organ miliak gareja nan katigo yaitu organ Katherine Potter-Brinegar. Organ ko dibuek pado taun 1995 dan dinamoi manuruik namo pasangan dari alumni Stanford. Organ ko tainspirasi dari organ Jerman nan dibuek pado taun 1610.[29][30]

Organ kaampek didapek pado Juni 2001. Organ ko dibuek dek Martin Pasi of Roy, Washington. Kasing jo ampia sadoalah pipanyo tabuek dari kayu kenari, dan kunci-kuncinyo tabuek dari kayu eboni jo kayu boxwood Inggirih.[30]

Organ kalimo didapek pado taun 2010 nan dibuek dek Hupado & Repasky Pipe Organs. Organ ko tainspirasi dari organ Inggris bagaya Tudor dari abaik ka16. Organ ko manggunokan pipa babahan logam.[30]

Galeri

suntiang
Kaco-kaco jandela Gareja Memorial Stanford pado sisi timur gareja.
 
"The Annunciation"
 
"The Home at Nazareth"
 
"The Sermon on the Mount"
 
"Christ Calming the Tempest"
 
"The Raising of Jairus' Daughter"
 
Detil ukiran sakaliliang pintu
 
Detil mozaik lua ruang
 
Detil mozaik fasad, di sisi kida jandela

Catatan

suntiang
  1. ↑ Manuruik Charles Hendrickson, Presiden Asosiasi Pambuek Pipa Organ Amerika (the Associated Pipe Organ Builders of America), "Gareja manopun nan mampunyoi labiah dari duo organ ka dapek paratian labiah".[29]

Rujuakan

suntiang
  1. ↑ Mérimée database 1993
  2. ↑ Nguyen, Ivy; Najarro, Ileana (30 October 2020). "Jobs honored at MemChu service". The Stanford Daily. Diakses tanggal 31 March 2020. 
  3. ↑ Joncas, p. 16
  4. ↑ Gregg, p. 34
  5. ↑ a b "About Memorial Church". Office for Religious Life. Stanford University. Diakses tanggal 30 March 2020. 
  6. ↑ Harvey, p. 3
  7. ↑ Harvey, p. 3
  8. ↑ Gregg, pp. 22–23
  9. ↑ Gregg, p. 22
  10. ↑ "Stanford Memorial Church Dedicated Yesterday with Impressive Ceremonies". San Francisco Chronicle. 26 January 1903. 
  11. ↑ Hall, p. 21
  12. ↑ Gregg, p. 22
  13. ↑ a b c d Taylor, Joseph A. "Memorial Church History". The Office for Religious Life at Stanford University. Diarsipkan dari versi asli tanggal 2020-03-12. Diakses tanggal 30 Maret 2020. 
  14. ↑ Palmer, Barbara (13 July 2001). "His Ph.D. Beckoning, Clock Tower Caretaker Winding Down His Volunteer Duties". Stanford Report. Diarsipkan dari versi asli tanggal 18 July 2007. Diakses tanggal 30 March 2020. 
  15. ↑ Hall, p. 22
  16. ↑ Gregg, p. 24
  17. ↑ a b c d e "Repair of Monuments 4: Memorial Church". Quake '06 Walking Tour. Diakses tanggal 31 March 2020. 
  18. ↑ Gregg, p. 25
  19. ↑ Hall, p. 21
  20. ↑ Junkerman, Charles (Fall 2010). "A Biography of Stanford Sandstone: From Greystone Quarry to Stone River" (PDF). Sandstone & Tile. 34 (3): 10. Diarsipkan dari versi asli (PDF) tanggal 22 September 2013. Diakses tanggal 30 March 2020. 
  21. ↑ Gregg, pp. 30–31
  22. ↑ Turner, p. 4
  23. ↑ "Gregg, Robert C. | Stanford Historical Society". historicalsociety.stanford.edu. Diakses tanggal 10 January 2020. 
  24. ↑ Turner, p. 2
  25. ↑ Oberhausen, p. 3
  26. ↑ Hall, p. 23
  27. ↑ Joncas, p. 28
  28. ↑ a b Trevino, Laramie (10 November 1999). "Staff Profile: Morgan on Organ". Stanford News Service. Diarsipkan dari versi asli tanggal 19 September 2006. Diakses tanggal 30 Maret 2020. 
  29. ↑ a b Treviño, Laramie (7 November 2003). "Unique organs to come alive at Stanford celebration". San Francisco Chronicle. Diakses tanggal 30 Maret 2020. 
  30. ↑ a b c d e "Memorial Church Organs". The Office for Religious Life at Stanford University. Diarsipkan dari versi asli tanggal 21 March 2020. Diakses tanggal 30 March 2020. 
  31. ↑ Wallace, Rebecca (2009-06-05). "Video: 'A Fascinating Machine'". Palo Alto Weekly. Diarsipkan dari versi asli tanggal 2013-08-20. Diakses tanggal 16 March 2020. 

Daftar pustaka

suntiang
  • Gregg, Robert C., Karen Bartholowmew, & Lesley Bone (1995). Stanford Memorial Church: Glory of Angels. Stanford, Calif.: Stanford Alumni Association. ISBN 0-916318-54-0
  • Hall, Willis Lincoln (1917). Stanford Memorial Church: The Mosaics, the Windows, the Inscriptions. Palo Alto, Calif.: Times Publishing Co.
  • Harvey, Van (Spring/Summer 1998). "Religious Studies at Stanford: An Historical Sketch". In Sandstone & Tile, Vol. 22, Nos. 2 and 3, pp. 3–10.
  • Joncas, Richard, David J. Neuman, and Paul V. Turner (2006). The Campus Guide: Stanford University. New York: Princeton Architectural Press. ISBN 1-56898-538-X
    • Turner, Paul V., "The Stanford Campus: Its Place in History", pp. 2–7.
    • Joncas, Richard, "Part 1: The Stanford Farm and Other Early Buildings", pp. 14–19.
    • Joncas, Richard, "Part 2: The Original Campus, 1886–1906", pp. 20–53.
  • Oberhausen, Judy (Spring 2005). "Stanford Memorial Church: A Late Victorian Jewel". In The Pre-Raphaelite Society Newsletter of the United States, No. 10, pp. 3–4.


Diambiak dari "https://min.wikipedia.org/w/index.php?title=Gareja_Memorial_Stanford&oldid=3150315"