Gabal Ughang

Gabal Ughang adolah namo makanan sahari-hari yang asalnyo dari daerah Lampung. Dinamoan Gabal Ughang karno bahan utamonyo udang. talapeh udangnyo dari sungai atau lauik. Urang Lampung biaso manjadiannyo lauak. Bahan-bahan untuak mambuek Gabal Ughang adolah udang, karambia mudo, daun pisang dan lidi untuak mambungkuih udang itu.

Udang yang biaso dimasak untuak gabal ughang adolah udang dari sungai dan lauik. Udang bisa didapekan dari sungai atau di lauik, atau bali langsuang di pasa ikan. Siap tu, bahannyo adolah karambia mudo yang biaso diambiak urang dari kabun atau pakarangan rumah, tapi sabagian urang ado juo yang mambali di pasa.

Siap tu, daun pisang yang digunoan untuak mambungkuih gabal ughang, biasonyo dari daun pisang batu yang ditanam di pakarangan rumah surang. Bagi yang indak mananam daun pisang batu bisa bali di pasa atau mintak ka urang sabalah. Dan lidi, bisa diambiak dari daun karambia di pakarangan rumah atau kabun atau bisa juo bali di pasa.

Kini ko, lidi bisa diganti jo salasiban yang bisa dibali di kadai atau pinjam ka urang lain. Bumbu yang paralu adolah merica, bawang merah, bawang putih, palo, sapadeh, dan garam. Bumbu itu bisa diambiak dari kabun surang atau bisa dibali di pasa.

Caro Mambuek

1. Udang dicampakan kulik jo kapalonyo, siap tu dibarasiahan dan ditumbuak sampai haluih
2. Karambia mudo dibarasiahan dan diparuik
3. Merica, bawang merah, bawang putiah, palo, sapadeh, dan garam ditumbuak sampai haluih
4. Udang dan bumbu yang alah dihaluihan itu dicampuo jo paruikan karambia mudo dan dikacau sampai marato
5. Bungkuih adonan udang itu jo daun pisang dan tusuak jo lidi
6. Siap dibungkuih, masuakan ka dandang dan abuih sampai masak salamo 45 minik
7. Siap masak, tirihkan dan lah bisa dikatangahan.