Ekonomi mikro

Ekonomi mikro (dalam bahaso inggris disabuik juo jo microekonomics) adolah sabuah ilimu nan mambahas tantang paran sasaurang atau individu sabagai palaku kagiatan ekomoni. Cabang dari ilimu ekonomi iko mampalajari perilaku konsumen jo parusahaan sarato panantuan harago-harago pasa jo kuantitas faktor input, barang jo jaso nan dipajua-belian. Salain itu ekonomi mikro dapek manaliti bagaimano babagai kaputusan jo parilaku tasabuik mampangaruahi panawaran jo pamintaan tahadok barang jo jaso, nan kan manantuan harago; jo bagaimano harago, kamudian salanjuiknyo manantuan panawaran jo pamintaan barang jo jaso nan salanjuiknyo.

Teori ekonomi mikro

Teori harago

HHHTeori harago atau disabuik juo jo price theory marupoan suatu upayo untuak mampalajari parilaku ekonomi dalam pangambilan kaputusan sacaro individu atau pamiliak sumber dayo dalam suatu kagiatan parekonomian. Harago nan pastinyo manjadi dasa untuak manganalisis interaksi antaro panawaran jo pamintaan barang atau jaso di pasa. Analisis ko diparaluan untuak proses pambantuakan harago, faktor nan dapek mampangaruahi parubahan pamintaan jo panawaran, hubuangan harago pamintaan jo panawaran, bantuak pasa, sarato jo konsep elastisitas.

Teori produksi

Teori produksi ko diigunoan sabagai dasaa untuak malakuan analisis biaya produksi jo tingkek produksi. Analisis iko dilakuan untuak: tingkek produksi nan paliang manguntuangkan produsen, kombinasi dari faktor produksi nan harus dipiliah produsen untuak mandapekan kauntuangan maksimal, jo bahubuangan dengan biaya produksi jo jaso.

Teori distribusi

Teori distribusi mampunyoi tujuan untuak malakuan analisis ekonomi mikro takaik jo upah untuak tanago karajo, banyanknyo bungo nan harus dibayiakan kapado pamiliak modal sarato jo kauntuangan nan didapek produsen.

Ruang lingkup ekonomi mikro

Mikro ekonomi mangkaji parilaku panjua jo pambali, tamasuak interaksi antaro kaduonyo dalam pasa faktor produksi. Singkeknyo, ruang lingkup ekonomi maliputi babarapo hal sabagai barikuik yakninyo;

• Pamintaan, panawaran, jo kasaimbangan harago pasa
• Elastisitas pamintaan jo elastisitas panawaran
• Teori parilaku konsumen
• Teori produksi, biaya produksi, panarimoan produsen, jo labo
• Pasa pasaingan samparono
• Pasa monopoli
• Pasa oligopoli
• Pasa pasaingan monopolistik
• Pamintaan akan input
• Mekanisme harago jo distribusi pandapatan

Tujuan ekonomi mikro

Ekonomi mikro mampunyoi babarapo tujuan antaro lain, partamo, ekonomi mikro dapek malakuan analisis tahadok mekanisme pasa nan mambantuak harago relatif kapado produk barang jo jaso, sarato alokasi dari sumber tabateh di antaro banyaknyo panggunoan alternatif. Kaduo, Ekonomi mikro dapek malakuan analisis kagagalan pasa, yaitunyo katiko pasa gagal dalam mamproduksi hasia nan efisien sarato jo dapek manjalehan babagai kondisi teoritis nan dibutuahan dek suatu pasa dengan pasaingan samparano.

Paran ekonomi mikro

Marumuskan kabijakan

Ekonomi mikro dapek manjadi dasa untuak marumuskan kabijakan parusahaan takaik dengan harago jo upah dalam pangalolaan sumber dayo. Dengan adonyo teori ekonomi mikro mako dapek dijadian sumber informasi untuak mampalajari interaksi di pasa dan bagaimano campu tangan pamarintah sahinggo dapek mambantuak kabijakan parusahaan nan strategis jo inovatif.

Manyusun prediksi

Ekonomi mikro dapek mambantu mamprediksi kamungkinan nan akan tajadi di pasa, misalnyo dalam hal trend produk. Dari pangartian ekonomi mikro sabalumnyo alah dijalehan yakninyo sabagai sumber informasi interaksi di pasa. Sahinggo dengan adonyo ekonomi mikro mako parusahaan dapek manyusun strategi atau prediksi untuak maso nan akan datang.

Mamahami parilaku kosumen

Malalui ekonomi mikro, mako sacaro indak langsuang parusahaan dapek mamahami bagaimano kabutuahan konsumen. Tantu sajo iko akan bapangaruah tahadok kamampuan produk atau jaso dapek batahan di pasa.

Mangatahui paputaran barang

Ekonomi mikro dapek manjadi alaik untuak mangatahui paputaran produk. Jiko nio batahan di pasa, mako suatu parusahaan harus mangawasi produk nan dijua supayo tatap barado dijalurnyo, tujuannyo iolah untuak manghindari kacurangan dari para pasiang.

Maningkekan produktivitas parusahaan

Produktivitas parusahaan dapek tacapai dengan dorongan babagai aspek sarupo sumber dayo manusia atau SDM nan bakualitas, produk nan tajamin kualitasnyo dan lainnyo. Sahinggo dengan maningkeknyo produktivitas dapek maningkekan kauntuangan parusahaan sacaro maksimal.