Edwel Yusri
Edwel Yusri Datuak Rajo Gampo Alam, atau biaso disabuik Datuk Edwel (lahia di Bukittinggi, Sumatera Barat, 6 Juli 1963; umua 60 taun) adolah saurang koreografer gerak silek jo ahli Silek Harimau Minangkabau.[1][2]
Edwel Yusri Datuak Rajo Gampo Alam | |
|---|---|
| Lahia | 6 Juli 1963 |
| Kabangsaan | Indonesia |
| Namo lain | Datuk Edwel |
| Alma mater | Universitas Muhammadiyah, Jakarta |
| Karojo | Pesilat, koreografer |
| Dikana dek | Ahli Silat Harimau Minangkabau |
Riwayaik suntiang
Edwel mandapek ilmu silek harimau dari kakeknyo, Dina Sutan Mangkuto, atau labiah acok dipanggia Inyiak Angguik.[3] Konon ilmu ko diwarihan turun-temurun dari harimau Sumatera di hutan dakek kampuangnyo, Balingka, Agam, pado maso kolonial. Inyiak Angguik pulo mampaliharo 8 ekor harimau nan dibaok dari hutan Pasaman sabalah kampuangnyo. Basamo harimau-harimau tu, Inyiak Angguik malatih silek di kolong rumahnyo nan bapangguang sambari bagarah jo inyiak-inyiak itu. Jurus-jurus nan didapek langsuang dari garak harimau ko bakambanglah manjadi Silek Harimau hinggo kini.[4] Salain itu, inyo baguru ka tujuah guru salingkuang Minangkabau, di antaronyo Sidi Bakar dari Perguruan Baringin Merapi, Enek Zainal, Pak Gaek Lintau, jo Datuk Kurai, untuak mangambangan silek harimau nan diajaran kakeknyo itu.[3][5] Katiko marantau di Jakarta, inyo masuak lo ka Ikatan Pencak Silat Indonesia (IPSI) dan dari situlah inyo mangenal dunia internasional malalui silek.[5]
Kini Datuk Edwel manjadi guru besar di Perguruan Silat Harimau Minangkabau banyak mambari pelatihan silek di ka banyak pihak, di antaronyo Perguruan Satria Muda Indonesia, Batalion Resimen Komando Kostrad 328 (Serpong), Resimen Mahasiswa Universitas Indonesia jo melatih anggota satuan kaamanan stasiun televisi RCTI.
Edwel Yusri adolah saurang sarjana hukum lulusan Universitas Muhammadiyah Jakarta, inyo mambari pahatian banyak kapado warisan budaya silek Harimau Minangkabau nan tarancam punah, inyo malah mambuek dunia silat tasabuik manjadi total. Inyo acok ma-ulah palatihan silat tasabuik di babagai tampek di Jakarta, utamo di Tanah Abang, Jakarta Pusat. Untuak manyokong itu, Edwel mandirikan Yayasan Paguyuban Ikhlas. Malalui yayasan tu, Edwel jo koleganyo, Hariadi Anwar dari Persekutuan Silat Antarbangsa manabikkan buku tantang silat harimau Minangkabau dalam bahaso Inggirih. Pado bulan Juli 2001, inyo batagak panghulu di kampuangnyo di Balingka, bagala Datuak Rajo Gampo Alam.[3]
Pangalaman nan banyaknyo dalam palatihan silat lah mambaoknyo ka banyak nagari di dunia, sarupo ka Balando, dan pado taun 2004, inyo jo anaknyo alah tampil di International Martial Arts Festival di Paris, Parancih.[6] Dibandiangan maso lalu di mana silek manjadi bela diri dan dipakai hanyo katiko disarang, Edwel Yusri labiah tabuka dan mamaduan silek jo seni modern. Hal itu dibuktiannyo katiko inyo manjadi koreografer silek dalam film Merantau nan dibintangi dek Iko Uwais jo Christine Hakim pado taun 2009.[7] Film itu mambuek silek Minangkabau dikenal ka dunia perfilman. Namun, inyo tetap setia jo kaaslian silek harimau, dan mangajaran silek itu di sasaran pupnyo inyo surang di Jakarta.[5]
Pado taun 2012, Edwel Yusri dan Madia Patra Ismar mambuek kolaborasi silek harimau tarian kontemporer. Madia Patra Ismar iolah saurang koreografer Minang nan tingga di Jakarta. Hasil kolaborasi itu ditampilan di Taman Ismail Marzuki Arts Center, bakarajo samo jo Greenpeace demi maningkekan parhatian masyarakat ka alam, bajudua Indahnya Hutan Kami (The Beauty of Our Forests). Acaro ko batujuan mangingekan masyarakat akan rantannyo kahidupan harimau sumatera kini, nan samakin bakurang jumlahnyo hinggo manuju kapunahan dek ulah manusia.[5]
Silek Harimau dikolaborasi baliak oleh Benny Krisnawardi dan Davit Fitrik jo Katia Engel dari Jerman dan Helly Minarti, dalam tarian bajudua In Between di Indonesia Dance Festival. Benny dan Davit, panari urang Minang nan marantau ka Jakarta, manyajikan kanang-kanangannyo salamo hiduik marantau. Panampilan tari itu manggunoan teknologi multimedia jo lukisan kasiak nan maggambaran harimau. Benny indak baraja Silek Harimau sacaro langsuang, malainkan mangolah garakannyo nan diingeknyo lalu diinterpretasi ulang dan dicampua jo gambaran harimau.[5]
Edwel Yusril bakato:
Bagi urang Minang, baraja silek indak sekedar baraja langkah atau gelek, tapi baraja silek pulo iolah baraja sijarah, dari tambo jo kaba dan warisannyo. Dek karano baraja latar belakang artinyo awak tau ta,pek, mangarati adat, mangarati agamo, baso kaduonyo saliang mandukuang, saliang manjalin, dari ateh ka bawah, kiri dan kanan, muko balakang; indak bisa dipisahan. Kaduonyo mangarahan sagalo sabagai satu kesatuan. Ikolah nan disabuik sijarah nan hiduik, sijarah nan indak ka mati salamo dunia ko ado.[5]
Rujuakan suntiang
- ↑ Lusiana Indriasari (16 September 2011). "Kerusakan Hutan Ancam Budaya Masyarakat". News. KOMPAS.com. Diakses tanggal 20 Januari 2024.
- ↑ Agnes Winarti (23 Mei 2009). "Pencak silat to hit the big screen". The Jakarta Post. Diakses tanggal 20 Januari 2024.
- ↑ a b c yuumori. "PROFILE: Edwel Yusri, Datuk Rajo Gampo Alam". Tumblr. Diakses tanggal 2024-01-20.
- ↑ Veby Mega Indah (17 September 2011). "Agar Inyiak (Harimau) Tetap Punya Rumah Hutan". Berita. Greenpeace Indonesia. Diarsipkan dari versi asli tanggal 2013-12-16. Diakses tanggal 20 Januari 2024.
- ↑ a b c d e f Madia Patra Ismar, Pudentia Maria Purenti S. S. & Syahrial. 2023. "Minangkabau Silek Harimau: Evolving Oral Traditions, Performance, and Choreography", dalam Melani Budianta & Sylvia Tiwon, Trajectories of Memory: Excavating the Past in Indonesia. Singapura: Palgrave Macmillan Singapore. ISBN: 978-981-99-1995-6.
- ↑ "Edwel Yusri, expert Silat Harimau". Figur Pesilat. Silat Indonesia. 10 Juni 2008. Diakses tanggal 20 Januari 2024.
- ↑ "Selamatkan Hutan dengan Silat Harimau". Diakses tanggal 20 Januari 2024.