Dendang Pauh

Dendang Pauh adolah jeniah kasanian lamo Minangkabau nan ado di daerah pinggia kota Padang, labiah tapeknyo daerah nan dulu banamo Padang Lua Kota. Kasanian iko batampek di sakiro Pauah Limo, (kini Kacamatan Kuranji jo Nanggalo). Dandang Pauah barupo nyanyian atau syair nan didendangkan jo alunan musik ambuih barupo saluang, marupoan alat musik ambuih nan tabuek dari sapotoang buluah nan panjangnyo labiah kurang 40cm jo diameternyo sakiro 2,5-3cm. Saluang Pauah ndak samo jo saluang darek. Bedanyo talatak di banyak lubangnyo. Lubang saluang darek ado limo buah lubang. Di sampiang itu, saluang pauah punyo anam lubang. Saluang pauh punyo tutuik atau sumbek nan talatak di ciek ujuangnyo sabagai lidah-lidah. Bantuaknyo mode bansi, tapi labiah gadang dari bansi. Dendang Pauh tanamo jo Pakok Anam (tutuik anam), nan marupoan pambuka atau pamanggia dan tanamo jo "saluang pado-pado", jo Pakok Limo (tutuik limo), marupoan dendang biaso. Dendang Pauh banyak disukoi urang tuo-tuo, talabiah kaum laki-laki. Kasanian Dandang Pauah biasonyo diadokan di acara baralek atau di wakatu-wakatu tatantua, sabagai pangubek sadiah. Kasanian iko biasanyo diadokan di palantan lapau. Urang nan mandanga Dandang Pauah biaso maagiah komentar tahadok syair nan didendangkan atau tahadok carito nan disampaian si padendang.

Kasanian Dendang Pauh marupoan kasanian dendang nan dipatunjuakan jo alat musik nan diiriang jo dendang kaba carito. Patunjuakan dendang pauh iko biasonyo dimainkan dek duo urang, surang pasaluang dan surang lai padendangnyo. Dendang nan biaso dimainan barisikan nasihat-nasihat jo carito nan basangkuik jo kahidupan masyarakat sahinggo bamanfaat untuak sado kalangan.