Dara Petak

Dara Petak atau Dara Pethak, nan bagala Indreswari, baliau satu-satunyo bini Raden Wijaya, pandiri Majopaik, nan barasa dari lua Jawa.

Dara Petak dalam Pararaton

Namo Dara Pethak samo jo marpati putiah. Baliau tu anak gadihnyo Srimat Tribhuwanaraja Mauliawarmadewa dari Karajaan Dharmasraya. Karajaan iko talatak di Pulau Sumatra Minangkabau nan ado sajak taun 1286 manjadi sakutu Karajaan Singhasari.

Manuruik Pararaton, sapuluah hari sasudah pangusiran pasukan Mongol dek pihak Majapahit, tibo lo pasukan Kebo Anabran sajak taun 1275 nan dikirim Kertanagara untuak manaklukkan Pulau Sumatra. Pasukan to mambaok duo urang anak gadih barnamo Dara Jingga jo Dara Petak nan ka dijodohan jo Kertanagara.

Karano Kertanagara alah meningga, ahli warihnyo jatuah ka Raden Wijaya nan manjadian Dara Petak sabagai bininyo, sadangkan Dara Jingga dipajodohan jo Adwayabrahma pajabaik Singhasari nan dulu dikirim ka Sumatra taun 1286.

Manuruik kronik Tiongkok, pasukan Mongol nan dipimpin dek Ike Mese maninggaan pulau Jawa tanggal 24 April 1293, sainggo dapek mampakiroan patamuan antaro Raden Wijaya jo Dara Petak nan tajadi sajak tanggal 4 Mei 1293.

Dara Petak pandai maambiak hati Raden Wijaya sainggo baliau dijadian sabagai Stri tinuheng pura, atau bini nan dituokan di istana. Sadangkan manuruik Nagarakretagama, Raden Wijaya alah mampunyoi ampek bini, dan kasadonyo tu anak dari Kertanagara.

Pangangkekan Dara Petak sabagai bini tatuo mungkin karano anyo iyo sorang nan malahiaan anak laki-laki nan diagiah namo Jayanagara. Sadangkan manuruik Nagarakretagama, mandeh Jayanagara barnamo Indreswari. Namo iko dianggap sabagai gala Dara Petak nan sah.

Dalam prasasti Kertarajasa (1305), Jayanagara disabuikan sabagai anak laki-laki Tribhuwaneswari permaisuri utamo Raden Wijaya. Dari kaba tu dapek dipakiroan Jayanagara ko adolah anak kanduang Indreswari atau Dara Petak nan kudian manjadi anak angkek Tribhuwaneswari, sainggo baliau dapek manjadi putra mahkota sabagai calon rajo salanjuiknyo.

Kapustakaan

• Poesponegoro & Notosusanto (ed.). 1990. Sejarah Nasional Indonesia Jilid II. Jakarta: Balai Pustaka.
• Slamet Muljana. 2005. Menuju Puncak Kemegahan (terbitan ulang 1965). Yogyakarta: LKIS
• Slamet Muljana. 1979. Nagarakretagama dan Tafsir Sejarahnya. Jakarta: Bhratara