Candi Padangroco
Candi Padangroco adolah salah satu situs budayo nan ado di daerah aliran Sungai Batanghari di Jorong Sungai Langsek. Dulu situs iko tamasuak dalam wilayah Kabupaten Sawahlunto-Sijunjung. Sasudah adonyo pamekaran, kini situs Candi Padangroco barado di Nagari Siguntur, Kecamatan Sitiung, Kabupaten Dharmasraya, Provinsi Sumatra Barat. Situs iko tamasuak paninggalan karajaan budha di Dharmasraya dan sabagai bukti kajayaan paninggalan karajaan Swarnabhumi (Dharmasraya) pado abaik XI-XII Masehi.[1] Manuruik hasia panilitian tantang candi ko, tadapek duo aliran agamo budha nan bakambang disinan pado wakatu tu nan banamo aliran Buddha Mahayana jo Buddha Tantrayana.[2] Salain itu, manuruik hasia rekonstruksi ditamuan bahwasanyo bantuak Candi Padangroco punyo gaya arsitektur nan babeda dari candi di Indonesia pado umumnyo, mulai dari bantuak punden barundak sarupo candi di Indo-Cina. Bantuak candi iko sarupo juo jo kabaradoan struktur kuno nan babantuak punden barundak nan ditamuan di Lampuang dan punyo analogi jo pakakeh tradisional di Palembang nan sarupo juo jo punden berundak.[3]
Sacaro kasaluruahan, kompleks Candi Padangroco tabuek dari susunan bata nan tadiri dari 4 candi lainnyo, tigo di antaronyo alah salesai digali dan dipuga yaitunyo Candi Padangroco I, Candi Padangroco II dan Candi Padangroco III.
Sajarah suntiang
Pado taun 1286-1347 Masehi, wilayah Dharmasraya pernah manjadi pusek pamarintahan dan ibu kota Kerajaan Malayu dan alah diakui dek urang nan ahli sajarah jo arkeologi. Kabaradoan Candi Padangroco sangkek itu manunjuakkan wilayah Dharmasraya pernah dijadian sabagai pusek pamarintahan. Dek karano itu dibueklah candi-candi sabagai sarana ibadah rajo, kaluarga dan rakyaiknyo. Daerah Sungai Langsek tampek ditamukannyo candi iko marupoan tampek ditamukannyo juo lapik arca Amoghapasa.[4]
Verkerk Pistorius adolah urang nan partamo kali malaporan kabaradoan Candi Padangroco katiko inyo malakuan panalitian kepurbakalaan di daerah aliran Sungai Batanghari pado awa 1860-an. L.C. Westenenk, saurang controleur bakabangsoan Belanda maadoan survei jo pametaan di daerah panemuan Candi Padangroco. Manuruik tamuannyo, di daerah tasabuik tadapek siso-siso bangunan candi bata nan babantuak gundukan. Gundukan itu dinamoi munggu dek panduduak satampek.
Pado taun 1991, di daerah Provinsi Sumatra Barat dilakuan panalitian epigrafi jo arsitektur dek Pusat Penelitian Arkeologi Nasional. Panilitian tasabuik dilanjuikan pado taun 1992 dek Suaka Peninggalan Sejarah dan Purbakala (SPSP) Provinsi Sumatra Barat dan Riau dengan malakuan survei pandataan arkeologi DAS Batanghari, dan ekskavasi Candi Sungai Langsek (Candi Padangroco). Hinggo situs itu ditinjau dan didata ulang dek tim Pusat Arkeologi Nasional nan sadang maadoan panilitian di daerah Rao, di Kabupaten Pasaman pado Mei 2014.[5]
Pakarangan Candi suntiang
Pakarangan Candi Padangcoro tadiri dari:
Candi Padangroco I suntiang
Candi Padangroco I adolah candi paliang gandang dibandingan jo tigo candi nan lainnyo dan manjadi candi induak. Candi iko baukuran 21 x 21 meter nan denahnyo babantuak bujursangkar. Struktur bata di bagian sisi kaki candi nan tasiso punyo katinggian kiro-kiro 90 cm dan tadiri ateh 22–26 lapih bata. Bagian tangah candi barisi tanah urugan jo ketinggian kiro-kiro 3 meter. Lapisan pondasi untuak bagian kaki candi tadiri dari campuran pasie jo karekel batu sataba 80 cm.[6]
Candi induak iko baorientasi pado arah baratdaya-timurlauik jo azimut 30º dari arah utara-selatan. Salain itu, Candi Padangroco I punyo tangga nan talatak di sisi kaki candi baratdaya. Candi tasabuik kiniko alah dalam kaadaan dipuga.[6]
Candi Padangroco II suntiang
Candi Padangroco II marupoan candi perwara dari Candi Padangroco I dan tabuek dari konstruksi susunan bata. badenah bujur sangkar, baukuran 4, 40 x 4,40 m. Kaki candi baukuran 4,40 x 4,40 m, tinggi vandi ko nan tasiso kiniko kiro-kiro 1,28 m. Bangunan candi baorientasi ka baratdaya–timurlaut jo pintu masuak dan janjang nan mahadok ka subalah barat.[6]
Candi Padangroco III suntiang
Candi Padangroco III tabuek dari susunan bata sarupo candi lainnyo nan bantuaknyo mamanjang ka arah baratdaya-timurlaut dengan azimut kito-kiro 10º dari arah utara-selatan. Candi iko tadiri ateh duo bangunan. Bangunan partamo marupoan candi dengan denah bujursangkar dan baukuran kiro-kiro 8,50 x 8,50 m. Bangunan kaduo adolah maṇḍapa dengan ukuran 13,50 x 8,50 m dan badenah ampat pasegi panjang. Kaduo bagian dari Candi Padangroco III nampak saolah manyatu baukuran 22 x 8,50 m. Saharusnyo tadapek siso janjang atau pintu di subalah baratdaya dari kaduo bangunan tasabuik, namun kiniko indak dapek ditamuan lai.[6]
Tamuan Lain di sakitar Candi suntiang
Di sakaliliang candi ditamuan parik kuno dari arah barat manyambuang ka utara dan habih di subalah timur nan bamuaro ka Sungai Batanghari. Manuruik tamuan BPCB Sumbar, bagian ujuang parik alah hampie rato jo pamukaan tanah, sahinggo sulik dikatahui. Sadangkan parik subalah bara masih dapek ditemui, walaupun kiniko alah manjadi jalan kabau, tapi parik basarato jo tanggulnyo relatif masih elok.[7]
Parik di bagian timur candi nan mambujua baratlaut-tenggara manembus kolam, nan kiniko manjadi sawah panduduak (sawah tabek) dengan leba sawah sakitar 20 – 40 m. Di ujuang tenggara candi, tadapek kolam bacabang ka arah utara jo selatan mambantuak huruf T. Tadapek juo parik nan mangarah ka timur, manuju bukik Giring nan tingginyo kurang labiah 176 cm di timur Jorong Koto Lamo di tapi kelokan Sungai Batanghari. Leba parik tasabuik antaro 4–8 m dan kadalamannyo 1–5 m.[7]
Caliak juo suntiang
| Ado kategori tantang Candi Padangroco di Wikimedia Commons |
Wikidata: Padang Roco Temple Compounds
Rujuakan suntiang
- ↑ "Dharmasraya Memiliki Candi Roco dan Sawah". www.harianhaluan.com. Diarsipkan dari versi asli tanggal 2019-02-23. Diakses tanggal 2019-02-22.
- ↑ Nusantara; Nasional; Polhukam; Olahraga; Bisnis, Ekonomi; Otomotif; Ragam; Pendidikan; Sosial. "TNI Bersihkan Kompleks Candi Padang Roco Dharmasraya". Antara News Sumbar. Diakses tanggal 2019-09-05.
- ↑ Daniardi, Ricky. Ria (2019). "REKONSTRUKSI BENTUK ARSITEKTUR CANDI PADANG ROCO DI KABUPATEN DHARMASRAYA SUMATERA BARAT". NALARs JURNAL ARSITEKTUR. Program Studi Arsitektur Fakultas Teknik Universitas Munammadiyah jakarta. Diakses tanggal 5 September 2019.
- ↑ "CANDI PADANG ROCO - Pemerintah Kabupaten Dharmasraya". Pemerintah Kabupaten Dharmasraya Adat Basandi Syarak, Syarak Basandi Kitabullah. Diarsipkan dari versi asli tanggal 2018-11-09. Diakses tanggal 2019-02-22.
- ↑ Hasan Djafar, (2014), Kompleks Candi Padangroco, editor., Ramelan, Wiwin Djuwita,. Candi Indonesia.. ISBN 9789798250484. OCLC 897346793. http://worldcat.org/oclc/897346793.Halaman: 91-92
- ↑ a b c d bpcbsumbar (2017-04-12). "Cagar Budaya Kompleks Candi Padang Roco di Kab. Dharmasraya Prov. Sumatera Barat". Balai Pelestarian Cagar Budaya Sumatera Barat (dalam bahasa Inggris). Diakses tanggal 2019-09-05.
- ↑ a b bpcbsumbar (2017-12-07). "Candi Padangroco di Kerajaan Melayu Dharmasraya". Balai Pelestarian Cagar Budaya Sumatra Barat (dalam bahasa Inggris). Diarsipkan dari versi asli tanggal 2021-02-25. Diakses tanggal 2019-02-22.