Bukik Bulek Taram

Bukik Bulek Taram merupakan objek wisata nan talatak di Kanagarian Taram, Kabupaten Limo Puluah Kota, Sumatera Barat. Bukik Bulek ko berjarak 11,5 KM dari kota Payakumbuh. Bukik Bulek ko merupakan sabuah bukik nan unik karena batu nan babantuak bulek, puncaknyo manonjol, dan sabana terjal. Bukik ko tagak sorang di tangah. Di kaki bukik ko tadapek bantangan tanah nan lueh jo rumpuik-rumpuik nan data.

Lokasi ko alun takelola dengan elok sadonyo, alun punyo fasilitas wisata nan ado di objek wisata ko, sahinggo masih merupakan potensi wisata alam nan bisa dikambangan sebagai asset wisata di daerah sekitar tu. Bukik Bulek Taram dikaliliangan dek rawa-rawa nan banyak ikannyo. Bagi nan suko mamanciang, biasonyo hari libur banyak urang nan pai mamanciang di rawa-rawa nan banyak ikan ketek-keteknyo. Biasonyo urang pai ka situ untuak basantai, malapeh panek, dan udaro di situ sajuak bana.

Namo Bukik Bulek ko diambiak dari bantuaknyo yang bulek, di puncaknyo saketek lonjong. untuak mancapai ka ateh bukik tu memamng mambutuahan tanago dan karingek nan banyak. Nan rancaknyo, di puncak bukik tu tadapek tanah lapang, luehnyo salueh lapangan bola. dek karena itu banyak urang bakemah di sinan.

Konon katonyo, Bukik Bulek taram ko dikaluaan dari bakeh pacahan 7 buah batu nan ado di Nagari Taram.

Kalau sadang baruntuang, di sinan bisa nampak buruang belibis bawarna itam. Buruang tu lalu-lalang mangaliliangi Bukik Bulek Taram tu. Jumlahnyo pun sampai ratuihan. Buruang tu biasonyo cari ikan ketek untuak dimakannyo di rawa-rawa sekitar sinan.