Binatang manyusuan

Binatang manyusui atau mamalia adolah kelas hewan vertebrata nan tarutamo dicirian dek adonyo kelenjar susu, nan pado batino manjadian susu sabagai sumber makanan anaknyo; adonyo rambuik; dan tubuah nan endoterm atau "badarah paneh". Utak maatur sistem jalannyo darah, tamasuak jantuang nan punyo ampek ruang. Mamalia tadiri labiah dari 5.000 genus, nan tabagi dalam 425 kaluarga dan hinggo 46 ordo, walaupun hal iko tagantuang klasifikasi ilmiah nan dipakai.

Binatang manyusuan

Sacaro filogenetik, nan disabuik Mamalia adolah sadonyo turunan dari anduang moyang monotremata (takah echidna) dan mamalia theria (punyo plasenta dan bakantuang atau marsupial)

Karakteristik

Kabanyakan mamalia iko malahiakan katurunannyo, tatapi ado babarapo mamalia nan tagolong ka dalam monotremata nan batalua. Kalahiaan iko tajadi pado banyak spesies indak-mamalia, takah pado lauak gapi jo hiu martil; mako dek itulah malahiakan indak dianggap sabagai ciri khusus mamalia. mode itu lo samo sifaik endotermik nan dipunyoi dek buruang.

Monotremata indak punyo putiang susu, namun tatok punyo kelenjar susu. Artinyo, monotremata mamanuahi syaraik untuak masuak ka dalam kelas Mamalia. Paralu untuak dikatahui bahwa taksonomi nan acok digunaon balakangan iko acok manakanan pado kasamoan nenek moyang; diagnosa karakteristik sangaik baguno dalam identifikasi asa usua suatu makhluk. Jikok ado salah ciek anggota Cetacea kironyo indak punyo karakteristik mamalia, mako inyo akan tatok dianggap sabagai mamalia karano anduang moyangnyo samo jo mamalia lainnyo.

Mamalia punyo 3 tulang pandangaran dalam satiok talingo dan 1 tulang (dentari) di satiok sisi rahang bawah. Vertebrata lain nan punyo talingo hanyo punyo 1 tulang pandangaran (yaitu, stapes) dalam satiok talingo dan paliang indak 3 tulang lain di satiok sisi rahang.

Mamalia punyo integumen nan tadiri dari 3 lampihan: paliang lua adolah epidermis, nan tangah adolah dermis, dan paliang dalam adolah hipodermis. Epidermis biasonyo tadiri ateh 30 lampih sel nan bafungsi manjadi lampihan tahan aia. Sel-sel paliang lua dari lampihan epidermis iko acok mangalokak; epidermis bagian paliang dalam acok mambalah dan sel anakannyo tadorong ka ateh (ka arah lua). Bagian tangah, dermis, punyo taba 15-40 kali dibandiang epidermis. Dermis tadiri dari babagai komponen takah pambuluah darah dan kelenjar. Hipodermis tasusun ateh jaringan adiposa dan bafungsi untuak manyimpan lamak, panahan antuakan, dan insulasi. Katabaan lampihan iko banyak macam variasinyo pado satiok spesies.