Batu Caves

Batu Caves (Tamil: பத்து மலை; Minangkabau: Guo Batu), adolah sabuah bukik kapua, nan mamiliki sarangkaian guo jo kuil guo, talatak di distrik Gombak, Selangor, Malaysia. Tampek ko dinamoi dari Sungai Batu, nan mangalia malalui bukik. Batu Caves marupoan juo namo desa tadakek.

Batu Caves பத்து மல
Pintu masuak ka Guo Batu, kuil Hindu sarato tampek wisata dakek Kuala Lumpur, jo patuang Dewa Murugan.
Batu Caves பத்து மல Lokasi di Malaysia
Koordinat:	3°14′14.64″N 101°41′2.06″E
Nama
Nama lain:	Guo Batu (Indonesia)
Nama diri:	Batumalai Sri Subramaniar Swamy Devasthanam
Tamil:	பத்து மலை
Lokasi
Negara:	Malaysia
Negara:	Selangor
Distrik:	Gombak
Lokal:	13 km utara Kuala Lumpur
Arsitektur dan Budaya
Dewa Utama:	Murugan
Gaya arsitektur:	Arsitektur Dravida
Sejarah
Tanggal pembangunan: (struktur saat ini)	1891
Pembuat:	K. Thamboosamy Pillai

Guo ko adolah salah satu kuil Hindu di lua India nan paliang populer, nan didedikasikan untuak Dewa Murugan. Situs ko adolah titiak fokus festival Hindu Thaipusam di Malaysia.

Sijarah

Interior dari Batu Caves

Batu kapua pambantuak Batu Caves dikatokan barumua sakita 400 juta taun. Babarapo pintu masuak guo digunokan sabagai tampek panampuangan bagi masarakaik adaik Tamuan (sabuah suku Urang Asli).

Pado awal 1860, pamukim Tiongkok mulai manggali guano untuak pupuak sayuran mareka. Namun, mareka manjadi takana hanyo satalah bukik-bukik kapua dicataik dek pamarentah kolonial tamasuak Daly jo Syers sarato naturalis Amerika, William Hornaday pado taun 1878.

Batu Caves dipromosikan sabagai tampek ibadah nan didirian dek K. Thamboosamy Pillai, saurang padagang India. Inyo terinspirasi dek pintu masuak guo utamo babantuak "Vel" dan terinspirasi untuak mandedikasikan sabuah kuil untuak Dewa Murugan di guo tasabuik.

Pado taun 1890, Pillai, nan pulo mandirikan Kuil Sri Mahamariamman, mambangun murti (patuang nan dikuduskan) dari Sri Subramania Swamy nan kini dikana sabagai Guo Kuil (Temple Caves). Sajak 1892, festival Thaipusam di bulan Tamil, Thai (nan jatuah pado akia Januari/awa Pebruari) alah dirayoan di sinan.

Janjang kayu sampai ka Guo Kuil dibangun pado taun 1920 dan alah digantian dek 272 anak janjang dari beton. Dari babagai guo kuil nan barado di situs tasabuik, guo nan tagadang jo paliang tanamo adolah Temple Caves, dinamokan damikian karano manaungi babarapa kuil Hindu di bawah langik-langik bakubah.

Pambangunan

Badiri satinggi 42.7 m (140 ft), patuang Murugan tatinggi di dunia, dewa Hindu, talatak di lua Batu Caves. Patuang sahargo sakita 24 juta Rupee, tabuek dari 1550 meter kubik beton, 250 ton bar baja dan 300 liter cat ameh nan didatangkan dari Thailand.

Pambangunan parumahan dimulai sajak 1970 jo parumahan sarupo Taman Batu Caves, Taman Selayang, Taman Amaniah, Taman Sri Selayang, dan Taman Medan Batu Caves.

Dalam babarapo dekade tarakia, daerah sakitanyo alah barubah dari sabuah desa ketek manjadi kawasan industri dan parumahan baru sarato toko-toko. Tadapek pulo jambatan layang malalui jalan rayo. Sabuah rel ekstensi KTM Komuter baru sanilai 515 juta Ringgit dari Sentul ka Batu Caves alah baoperasi pado bulan Juli 2010, dan satasiun komuter Batu Caves pulo alah dibuko.

Pado tangga 1 Januari 2011, salamo festival Thaipusam di taun tasabuik, diumuman baso kareta gantuang ka dibangun untuak festival taun barikuiknyo. Pambangunan tasabuik ka manalan biayo sakita 10 juta ringgit.

Situs religius

Badiri ampia 100 m di ateh tanah, kompleks Batu Caves tadiri dari tigo guo utamo dan babarapo guo nan labiah ketek. Guo tagadang, disabuik sabagai Guo Katedral atau Guo Kuil (Temple Caves), mamiliki tinggi 100 m dan langik-langik bahias ukiaran elemen Hindu. Untuak mancapainyo, pangunjuang haruih mandaki 272 anak janjang nan curam.

Di dasa bukik tadapek duo guo kuil, Guo Galeri Seni jo Musium Guo, baik nan barisi patuang-patuang maupun lukisan Hindu. Kompleks iko direnovasi jo dibuko sabagai Vila Guo (Cave Villa) pado taun 2008. Banyak kuil nan takaik jo kisah kamanangan Dewa Murugan ateh ibilih Soorapadam. Tur audio tasadio untuak pangunjuang.

Guo Ramayana talatak di sabalah paliang kida sabagai salah satu nan maadok dindiang bukik. Dalam pajalanan ka Guo Ramayana, tadapek patuang Hanuman satinggi 50-kaki (15 m) dan sabuah kuil nan didedikasikan untuak Hanuman, pambantu Dewa Rama. Upacaro parasmian kuil tasabuik diadoan pado bulan Nopember 2001.

Guo Ramayana manggambaan carito Rama sacaro bauruik sapanjang dindiang guo nan indak rato.

Sabuah patuang Dewa Murugan satinggi 42.7 meter (140 ft) dirasmian pado Januari 2006, mambutuahan wakatu 3 taun untuak mambangunnyo. Patuang tasabuik adolah patuang Dewa Murugan tatinggi di dunia.

Festival

Ikon dibaok dalam prosesi Thaipusam di Batu Caves. taliek pulo di lata balakang adolah patuang ameh Dewa Murugan satinggi 42.7 m.

Batu Caves bafungsi sabagai titiak fokus bagi festival taunan Thaipusam (bahaso Tamil: தைபூசம்) bagi masarakaik Hindu. Lokasi ko alah manjadi sabuah situs ziarah bagi umaik Hindu indak anyo di Malaysia, tatapi umaik Hindu di saluruah dunia dari nagara-nagara sarupo India, Australia dan Singapura.

Prosesi Thaipusam dimulai pado dini hari dari Kuil Sri Mahamariamman manuju Batu Caves sabagai kagiatan agamo untuak Dewa Murugan nan balansuang salamo salapan jam. Pangikuik prosesi ko mambao tampek baisi susu sabagai pasambahan kapado Dewa Muruga, baiak dibao jo tangan atau dijunjuang di ateh bahu dalam tampek gadang nan bahias nan disabuik kavadi.

Satalah prosesi mandi di Sungai Batu di dakek kawasan ko, para pangikuik bajalan manuju Guo Kuil. Pangikuik prosesi ko manggunoan utamo nan labiah laweh, samantaro umaik Hindu lain sarato karumunan panonton naiak jo turun di janjang ketek pado kaduo sisi janjang utamo tasebuik. Katiko pambao kavadi tibo di anak janjang ka-272 manuju Guo Kuil, para umaik ka malanjuikan ka pandakian nan labiah sulik.

Pado taun 2007, festival ko manariak labiah dari 1.5 juta umaik Hindu dari saluruh dunia, manjadiannyo salah satu dari "partamuan damai tagadang dalam sijarah dunia".

Administrasi

Kuil Batu Malai Sri Subramaniar dikalola dek Dewan Pengalolaan Sri Maha Mariamman Temple Devasthanam, nan mangalola pulo Kuil Sri Mahamariamman dan Kuil Kortumalai Pillaiyar. Dewan tasabuik baparan pulo sabagai Konsultan Agamo Hindu bagi Pamarentah Malaysia dalam manantuan kalender taunan umaik Hindu Malaysia.

Alam, flora, jo fauna

Monyet ekor panjang

Di Batu Caves tadapaik guo-guo nan masih asli jo baragam fauna di dalamnyo, tamasuak babarapa spesies unik, sarupo laba-laba Liphistiidae dan Eonycteris, dan kalalawa Rousettus. Situs ko dikenal juo jo babagai baruak ikua panjang, nan dibari makan dek pangunjuang sacaro sukarela. baruak ko dapek pulo manimbuaan bahayo karano suko manggigik wisatawan (tarutamo anak ketek) karano mareka cukuik teritoris.

Di bawah Guo Kuil tadapek Guo Kalam (Dark Caves), jo formasi batuan dan sajumlah ewan ditamuan di tampek tasabuik. Jariangan guo-guo sapanjang duo kilometer jo sacaro relatif alun tasantuah lai. Stalaktit manonjol dari langik-langik guo, dan stalagmit muncua dari dasa guo mambantuak babagai formasi rumik sarupo jo tirai, aliaran batu, mutiaro jo karang, nan mamakan wakatu ribuan taun untuak tabantuaknyo.

Dalam rangka mapatahanan ekologi guo, akses ka daerah tasebuik dibatasi. Malaysia Nature Society mangatua pajalanan rutin untuak pandidiakan jo patualangan reguler ka guo tasabuik.

Panjek tabiang

Batu Caves alah marupoan pusek pangambangan panjek tabiang di Malaysia salamo 10 taun tarakhir. Guo Batu manawakan labiah dari 160 jalua pamanjatan. Rute nan tadapek di saluruah sisi Guo Batu, tadiri dari pandakian pabukitan kapua satinggi 150 m. Rute ko marupoan jalua pamanjatan nan mudah dicapai karano marupoan tabiang paliang dasa dari pamukoan tanah.

Akses

Batu Caves talatak 13 km dari ibukota Kuala Lumpur. Caro tamudah untuak mancapai Batu Caves adolah jo manggunoan kareta komuter dari satasiun komuter KL Sentral, jo tarif 2 RM untuak satu kali perjalanan. Sanak juo dapek manggunokan taksi, jo tarif sakita 20-25 RM dari KL Sentral (atau labiah). Pangunjuang dapek pulo mancapai Batu Caves manggunoan Bus Terminus 11/11d dari Bangkok Bank (Dakek Terminus Puduraya) atau Bus U6 dari Titiwangsa.

Galeri

• 
  Patung Dewa Murugan di lua Batu Caves
• 
  Di dalam Batu Caves
• 
  Patung Dewa Murugan di dalam Batu Caves
• 
  Batu kapur di Cave Villa
• 
  Gambar tradisional Hindu di Cave Villa
• 
  Ukiran batu nan rumit

Caliak pula

• Hinduisme di Malaysia
• Kavadi

Pranala luar

• Thaipusam di Batu Caves, Malaysia
• Cave fauna Archived 2015-08-12 di Wayback Machine.
• Panjat tebing di Batu Caves
• Thaipusam di Penang, Malaysia