Batu Batikam
Batu Batikam adolah salah satu bando cagar budayo basijarah di Jorong Dusun Tuo, Nagari Lima Kaum, Kabupaten Tanah Datar, Provinsi Sumatra Barat.[1] Jikok diartikan kadalam Bahaso Indonesia, Batu Batikam bararti batu nan tatusuak. Manuruik sijarah, lubang atau tusuakan nan ado di tangah batu itu marupokan bakeh dari tusuakan karih Datuak Parpatiah Nan Sabatang.[2] Laweh situs cagar budayo Batu Batikam adolah 1.800 meter pasagi, dulu bafungsi sabagai medan nan bapaneh atau tampek bamusyawarah kapalo suku. Susunan batu disakuliliang batu batikam sarupo sandaran tampek duduak, babantuak pasagi panjang malingka. Pado bagian tangah tadapek batu batikam dari bahan batuan Andesit. Batu iko barukuran 55 x 20 x 40 sentimeter, jo bantuak ampia sagi tigo.[3] Prasasti Batu Batikam manjadi salah satu bukti kabaradaaon Kerajaan Minangkabau di zaman Neolitikum.[4] Batu batikam marupokan batu tatusuak nan malambangkan pantiangnyo padamaian Jo musawarah-mufakik dalam kshidupan masyarakaik Minangkabau.[5]
Kaunikan
suntiangBatu iko dinamokan batu batikam atau batu tatusuak adolah karano adonyo bakeh tusuakan pado bagian batu Tasabuik.[5] Sacaro logika, hal iko mungkin sulik ditarimo oleh aka maingek batu adolah sabuah bando nan sangaik kareh sahinggo indak mungkin untuak ditusuak jo manyisoan sabuah lobang nan tambuih.
Manuruik carito nan diyakini masyarakaik satampek, Batu Batikam marupokan bakeh tusuakan karih miliak Datuak Parpatiah Nan Sabatang nan manjadikan batu batikam sabagai simbol perdamaian antar pamimpin nan bakuaso pado maso tu
Carito lain manyatoan bahwa paninggalan sijarah iko dahulu kala marupokan suatu ttampek musawarah para kapalo suku.[5] Hal lain nan manambah kaunikan Batu Batikam adolah adonyo sabuah pohon beringin nansangaik gadang di sakita saedaran tasabuik. Selain tu, lubang pado batu batikam iko dapek disantuah dan diliek langsuang oleh pangunjuang.[2]
Datuak Parpatiah Nan Sabatang jo Datuak Katumanggungan adolah duo orang sudara nan balainan bapak. Datuak Parpatiah Nan Sabatang adolah surang sosok nan dilahiakan dari surang bapak nan mamiliki darah aristokrat (cadiak pandai), samantaro Datuak Katumanggungan adolah sosoak nan dilahiakan dari surang bapak nan otokrat (raja-berpunya). Tatapi kaduo di antara mareka lahia dari surang rahim ibu nan samo, dima surang padusi biaso sarupo lainnyo. Datuak Parpatiah manginginkan masyarakaik diatur dalam samangaik nan demokratis, atau dalam tatanannyo, "Duduak samo randah, tagak samo tinggi". Namun Datuak Katumanggungan manginginkan rakyaik diatur dalam tatanan nan hierarki "bajanjang samo naik, batangga samo turun". Dan karano pabedoan tasabuik mareka baduo batangka hebat. Untuak manghindari patikaian dan indak saling malukoi, Datuak Parpatiah jo Datuak Katumanggungan kamudian manikam batu tasabuik jo karih sabagai palampiasan emosinyo. Mako dari itu Batu Batikam mamiliki sabuah lubang nan manambuih dari arah sisi muko jo belakang.[6]
Meskipun takasan manyaramkan, namun Batu Batikam manjadi salah satu lokasi wisata nan acok manariak minaik wisatawan.[5] Salain mamiliki kaunikan nan mambuek wisatawan penasaran, batu iko juo dinilai manganduang unsur palajaran, pangatahuan jo hikmah tantang pentiangnyo padamaian.
Hinggo saaik iko, pandapek nan babedo antaro Datuk Parpatih nan Sabatang jo Datuk Katumanggungan masiah taliek dari adonyo duo kasarasian di Minangkabau, yakni kasarasian Koto Pilang, nan mancaminkan sistem kakuasaan ala Datuk Katumanggungan jo kasarasian Bodi Chaniago nan marupokan pawujuikan sistem pamarintah ala Datuk Parpatih Nan Sabatang.[5]
Lokasi
suntiangBatu Batikam talatak di Jorong Dusun Tuo, Nagari Limo Kaum, Kecamatan Lima Kaum, Tanah Datar, Sumatra Barat,[7] sakita 10 menit parjalanan dari Koto Batusangkar.[5] sadangkan dari koto Padang, ibu kota provinsi Sumatra Baraik bajarak labiah kurang 100 km atau duo sampai tigo jam parjalanan jo bus dan kandaraan pribadi. lokasinyo tapek barado di tapi jalan rayo sahinggo sangaik mudah untuak di kunjuangi. Batu Batikam tamasuk salah satu lokasi cagar budaya, berado dalam pangawasan Kantua Suaka Paninggalan Sijarah dan Purbakala Sumbar, Riau jo Jambi nan bakantua di Pagaruyuang.[1]
Rujuakan
suntiang- ↑ a b (Indonesia) Haluan. "Batu Batikam Lambang Perdamaian". Diarsipkan dari versi asli tanggal 2014-09-26. Diakses tanggal 12 Mei 2014.
- ↑ a b (Indonesia) Antara SumBar. "Batu Batikam". Diakses tanggal 12 Mei 2014.
- ↑ (Indonesia) Padang Today. "Situs Batu Batikam". Diarsipkan dari versi asli tanggal 2014-05-12. Diakses tanggal 12 Mei 2014.
- ↑ (Indonesia) EO Community. "Situs Sejarah Batu Batikam". Diakses tanggal 12 Mei 2014.
- ↑ a b c d e f (Indonesia) Pelangi Holiday. "Batu Batikam Lokasi Wisata Bersejarah". Diarsipkan dari versi asli tanggal 2013-11-09. Diakses tanggal 12 Mei 2014.
- ↑ (Indonesia) Andy Febrian. "Asal Usul Batu Batikam di Lima Kaum". Diarsipkan dari versi asli tanggal 2015-03-31. Diakses tanggal 12 Mei 2014.
- ↑ (Indonesia) Foursquare. "Batu Batikam". Diakses tanggal 12 Mei 2014.