Basrief Arief
Basrief Arief, S.H., M.H. (lahia di Tanjung Enim, Sumatera Selatan, 23 Januari 1947 – maningga di Jakarta, 23 Maret 2021 pado umua 74 taun) adolah Jaksa Agung Indonesia nan mamulai jabatannyo pado tanggal 26 November 2010 sampai 20 Oktober 2014, basamo Darmono jo Andhi Nirwanto sabagai Wakil Jaksa Agung.[1]
Basrief Arief | |
|---|---|
 | |
| Lahia | 23 Januari 1947 |
| Maningga | 23 Maret 2021 (umua 74) |
| Resting place | Taman Makam Pahlawan Kalibata |
| Kabangsaan | Indonesia |
| Karojo | Jaksa |
| Kantua | Jaksa Agung Republik Indonesia |
| Pandahulu | Darmono (Plt.) |
| Panaruih | Andhi Nirwanto (Plt.) |
| Pasangan | Asminar |
| Anak | Abraham Arief, Barnal Arief, Elfira Arief |
Kaluarga
suntiangBasrief Arief adolah anak dari pasangan Bagindo Bachtiar Arief jo Siti Aminah, urang Minangkabau nan barasa dari Padang Pariaman nan marantau ka Muara Enim, Sumatra Selatan. Ayah Basrief adolah salah surang pajabat di PN Tambang Arang Bukit Asam sampai inyo maningga.[2]
Basrief manikah jo Asminar nan barasa dari Pakanbaru, Riau. Pasangan iko dikaruniai tigo urang anak, yaitu Abraham Arief, Barnal Arief, jo Elfira Arief, sarato ampek cucu.[3]
Pandidikan jo karier
suntiangBasrief Arief adolah lulusan Fakultas Hukum Universitas Andalas jo Program Pascasarjana Universitas Padjadjaran.[3]
Basrief Arief mamulai kariernyo sabagai Asisten Pidum Kejaksaan Tinggi Jakarta, kamudian sabagai Staf Ahli Kajaksaan Agung RI, Kapalo Biro Umum, jo Kapalo Kajaksaan Tinggi Jakarta. Inyo pernah juo manjabat sabagai Kapalo Kajaksaan Negeri Belawan, kamudian manjabat Kapalo Kajaksaan Negeri Cibinong, jo Kapalo Kajaksaan Negeri Jakarta Pusat. Basrief adolah Wakil Jaksa Agung pado taun 2005 sampai inyo pensiun pado bulan Februari 2007. Babarapo pandidikan kadinasan nan ditampuahnyo sasudah bagabuang jo Kajaksaan Agung antaro lain pandidikan Susdas Wira Intel (1987), Trampil Jaksa Pidum (1988), Spadya (1990), Penyelundupan (1992), Sespanas (1995), Lemhanas (1991), sarato Perjanjian RI-Prancis (2003) di Parancih. Arief dilantiak di Istana Nagari dek Presiden Susilo Bambang Yudhoyono pado hari Jumat, 26 November 2010. Inyo manggantian Hendarman Supandji nan alah salasai maso jabatannyo.[4]
Namo Basrief Arief banyak disabuik sajak taun 2000 katiko inyo manjabat sabagai Kapalo Bagian Humas Kajaksaan Agung, nan kamudian bakambang sairiang jabatannyo sabagai Jaksa Agung Muda Intelijen. Dalam jabatan itu, Basrief pernah manjadi Ketua Tim Terpadu Pencari Terpidana dan Tersangka Perkara Tindak Pidana Korupsi, atau labiah populer disabuik Tim Pancari Koruptor.[4] Inyo mandapek tanda kahormatan Bintang Mahaputera Adipradana pado taun 2014 dari Presiden Susilo Bambang Yudhoyono.[5]
Maningga dunia
suntiangBasrief Arief maningga dunia pado hari Selasa, 23 Maret 2021 pado umua 74 taun. Janazahnyo dikubuan di Taman Makam Pahlawan Kalibata, Jakarta.[5]
Tando kahormatan
suntiang- Tanda Kehormatan Satyalancana Karya Satya (10 tahun)
- Tanda Kehormatan Satyalancana Karya Satya (20 tahun)
- Tanda Kehormatan Satyalancana Karya Satya (30 tahun)
- Bintang Mahaputera Adipradana Tahun 2014
Rujuakan
suntiang- ↑ "Jampidsus Andhi Nirwanto Jadi Wakil Jaksa Agung yang Baru". detik.com. 20 November 2013. Diakses tanggal 20 Januari 2024.
- ↑ "Bas Si Sulung yang Pendiam". tribunnews.com. 27 November 2010. Diakses tanggal 20 Januari 2024.
- ↑ a b "Inilah Garis Hidup Seorang Basrief Arief". tribunnews.com. 28 November 2010. Diakses tanggal 20 Januari 2024.
- ↑ a b "Basrief Arief, Jaksa Agung Era SBY-Ketua Tim Pemburu Koruptor". cnnindonesia.com. 23 Maret 2021. Diakses tanggal 20 Januari 2024.
- ↑ a b "Jenazah mantan Jaksa Agung Basrief Arief dimakamkan di TMP Kalibata". antaranews.com. 23 Maret 2021. Diakses tanggal 20 Januari 2024.
| Didaului jo: Darmono Pelaksana Tugas |
Jaksa Agung Indonesia 2010–2014 |
Digantian dek: Andhi Nirwanto Pelaksana Tugas |