Badah

Badah atau pambadahan (bahaso Inggirih: surgery, bahaso Yunani: cheirourgia "karajo tangan") adolah spesialisasi dalam kadokteran nan maubek panyakik atau luko jo operasi manual dan instrumen. Ahli bedah (surgeon) dapek marupokan dotor, dotor gigi, atau dotor hewan nan mampunyoi spesialisasi dalam bidang ilimu badah. Istilah ahli kini labiah lazim disabuik sabagai spesialis. Kok disabuik sabagai spesialis badah sajo mangko itu adolah dotor, sadang untuak dotor gigi lazim disabuik dotor gigi spesialis badah muluik, samantaro untuak dotor hewan lazim disabuik spesialis badah hewan.

Ahli badah sadang malakukan suatu pambadahan

Tindakan pambadahan dilakukan dek surang spesialis badah. Ado bamacam-macam spesialis nan malakukan tindakan pambadahan. Umumnyo pambagian spesialisasi samo di ampia sadoalah balahan dunia. Di Indonesia spesialis badah bagabuang di dalam suatu federasi nan banamo IKABI (Perhimpunan Spesialis Bedah Indonesia) dan dalam bahaso Inggirih labiah tanamo jo ISA (Indonesian Surgeon Association). Anggota IKABI kini tadiri dari 10 OPLB (Organisasi Profesi di Lingkungan Bedah) nan satiok OPLB marupokan spesialisasi ataupun subspesialisasi.

Subspesialisasi

Spesialisasi badah nan ado kini adolah

1. Spesialis Badah Umum
2. Spesialis Orthopedi
3. Spesialis Urologi
4. Spesialis Badah Plastik
5. Spesialis Badah Saraf
6. Spesialis Badah Toraks, Kardiak & Vaskular
7. Spesialis Badah Anak
8. Spesialis Badah Subspesialis Vaskular dan Endovaskular
9. Spesialis Badah Subspesialis Badah Digestif
10. Spesialis Badah Subspesialis Badah Onkologi

Tujuah nan partamo adolah marupokan spesialisasi sadang tigo tarakhia marupokan subspesialisasi.

Spesialis Badah Umum adolah surang nan mampunyoi ilimu jo katerampilan dalam hal diagnosa, parawatan sabalun operasi, operasi, jo panatalasanaan sasudah operasi pado area barikuik: saluran cerna, paruik jo isinyo, payudara, kulik jo jariangan lunak, kapalo ko lihia, pambuluah darah, endokrin, kalainan baokan jo tumor, khususnyo tumor kulik, kelenjar liua, tiroid, paratiroid, rongga muluik, sistem pambuluah darah kacuali jantuang jo pambuluah darah dalam utak.

Spesialis Badah Orthopedi adolah spesialis nan bidangnyo adolah sistem otot jo tulang. Surang spesialis badah orthopedi manangani kalainan pado tampek tasabuik baiak jo caro pambadahan ataupun tanpa pambadahan.

Spesialis Urologi adolah spesialis nan manangani kalainan pado sistem saluran kemih laki-laki jo padusi, sarato manangani juo organ reproduksi laki-laki.

Spesialis Badah Saraf adolah suatu cabang ilimu kadokteran nan malakukan panagahan, diagnosa, ubek, jo rehabilitasi satiok gangguan pado sistem saraf sarupo utak, sumsum tulang balakang, saraf tapi, jo sistem pambuluah utak.

Spesialis Badah Plastik adolah surang spesialisasi dalam ilimu badah nan batujuan untuak mampeloki karusakan atau mambaliakan bantuak tubuah.

Spesialis Badah Subspesiali Vaskular jo Endovaskular marupokan subspesialisasi dari badah umum utamonyo mandalami ilimu tantang pambuluah darah arteri, vena, jo sistem limfatik. Inyo mampunyoi kamampuan malakukan pambadahan nan dilakukan dek spesialis badah umum dan juo santiang malakukan pambadahan, ubek, sarato tindakan invasif minimal pado pambuluah darah.

Spesialis Badah Subspesialis Badah Digestif marupokan subspesialisasi dari badah umum dan salain talok malakukan tindakan pambadahan sarupo badah umum lainnyo, inyo santiang pulo malakukan tindakan badah pado saluran cerna.

Spesialis Badah Subspesialis Badah Onkologi marupokan subspesialisasi dari badah umum dan salain talok malakukan tindakan pambadahan sarupo badah umum lainnyo, inyo santiang pulo malakukan tindakan badah tumor sarupo tumor jariangan lunak.

Spesialis Badah Toraks, Kardiak & Vaskular (Badah Paru, Jantuang & Pambuluah Darah) adolah bidang kadokteran nan talibaik dalam parawatan medis & badah panyakik - panyakik nan mampangaruahi organ di dalam toraks (dado) utamonyo jantuang, paru maupun sadoalah sistem pambuluah darah kacuali utak. Tadiri dari tindakan badah tabukak jo tindakan invasif non badah sarupo intervensi perkutaneus.