Andani Eka Putra
Dr. dr. Andani Eka Putra, M.Sc. (lahia di Tarusan, Sumatra Barat, 15 Agustus 1972; umua 52 taun) adolah dotor Indonesia nan kini manjabaik sabagai Kepala Laboratorium Pusat Diagnostik dan Riset Penyakit Infeksi Universitas Andalas (Unand), Padang. Salain itu, inyo marupoan salah saurang direksi Rumah Sakit (RS) Unand.[1] Andani banyak urang nan tau tantang jasonyo pado maso pandemi COVID-19 di Sumatra Barat sarato disabuik dalam rilis Badan Nasional Penanggulangan Bencana (BNPB) sabagai "Patriot Militan di Tengah Pandemi".[2]
Andani Eka Putra | |
|---|---|
 | |
| Lahia | 15 Agustus 1972 Tarusan |
Andani awalnyo batugas di bagian mikrobiologi Fakultas Kedokteran (FK) Unand sarato bakarajo di bidang bioteknologi medis.[3] Katiko pandemi koronavirus 2019 mulai manjangkik, inyo mangambangan laboratorium mikrobiologi FK manjadi pusek palayanan diagnostik panyakik inpeksi sampai akhianyo manjadi Laboratorium Infeksi Biomedik. Sajak Maret 2020, laboratorium tu mandapek ijin dari Kementrian Kasihatan untuak malakuan uji sampel swab urang nan disangko kanai koronavirus 2019. Iko sabalumnyo hanyo dikaji di Litbangkes Kemenkes RI.[4][5].
Pandidikan
suntiangTamat dari SMA Negeri 3 Padang pado taun 1991, Andani masuak ka Fakultas Kedokteran (FK) Universitas Andalas. Samaso manjadi mahasiswaa, inyo aktif dalam dunia kampus. Andani lulus dari Unand taun 1996. Sasudah tamat, inyo maambiak pandidikan magister Jurusan Kedokteran Tropis di Fakultas Kedokteran Universitas Gadjah Mada (UGM). Inyo salasai di UGM taun 2009. Kamudian inyo mandapekan gala doktor di Fakultas Kedokteran Universitas Gadjah Mada (UGM) pado tahun 2016.[6] Disertasi Andani di UGM mambahas tantang genotyping Mycobacterium tuberculosis isolat lokal.[6]
Panghargaan
suntiangAndani Putra pernah mandapekan panghargaan dari Wali Kota Padang Mahyeldi Ansharullah sabagai masarakaik taladan. Panghargaan itu diagiahan katiko hari ulang taun Kota Padang nan ka 351 pado tangga 7 Agustus 2020[7]. Salain itu, Andani Putra parnah pulo mandapekan panghargaan dari iNews sabagai Tokoh Profesional di ajang Indonesia Awards 2020 nan bertajuk "Kebanggaan Indonesia"[8]
Penanganan COVID-19
suntiang
Sabalum pandemi koronavirus manjangkik di bumi ko, Andani biasonyo bakarajo di bagian mikrobiologi FK Universitas Andalas. Inyo banyak bakontribusi di bidang bioteknologi medis. Katiko bakarajo di situ, Andani punyo kainginan kuat baa caronyo nantik laboratorium tu bisa maagiahan palayanan ka diagnostik panyakik infeksi nan bisa digunokan dek masarakaik. Sajak 2016, inyo malangkokan fasilitas di laboratorium jo pitih siso panalitian inyo surang sarato bantuan dari banyak pihak kamudian mangambangkannyo untuak diagnostik rotavirus dan virus papiloma manusia.[2][9][10]
Pado akhia tahun 2019, laboratorium mandapek bantua pitih dari universitas untuak mambangun fasilitas laboratorium nan ado kini, walaupun realisasi anggaran pitih baru 60%. Awal tahun 2020, Andani mulai bapikia baa caro bisa ikuik sato dalam mangambangkan diagnostik koronavirus 2019 nan alah banyak manyeba.
Di awal bulan Pebruari 2020, inyo maambiak kaputusan untuak maagiahkan babarapo alat nan inyo punyo ka laboratorium. Jikok barang-barang tu diganti jo pitih, pitih nyo kiro-kiro Rp 2 miliar. Bantuan paralatan lainnyo banyak pulo nan masuak, tamasuak masin real time polymerase chain reaction (RT-PCR) dari Wali Kota Padang Mahyeldi Ansharullah jo urang nan punyo Wardah, Nurhayati Subakat.[2]
Pado 24 Maret 2020, laboratorium FK Unand mandapek ijin dari Kementerian Kasihatan untuak malakuan uji sampel swab untuak urang nan disangko takanai COVID-19.[11] Sabalumnyo pangujian sampel swab hanyo tapusat di Litbangkes Kemenkes RI.[12]
Untuak mambantu pamaresoan sampel swab di laboratorium, Andani maminta karajo samo jo mahasiswa sarato dosen kedokteran Unand sampai takumpua 40 atau 50 urang nan barasa dari bidang nan babeda-beda, yaitu biologi, kimia, pertanian. [10][13]
Di laboratorium FK Unand, ratusan sampel dipareso satiok harinyo.[14] Awalnyo, laboratorium mambuek target pamaresian 200 sampel tiok hari, tapi palaksanaannyo labiah dari target yaitu sampai 320 sampel.[2] Sampai tanggal 18 - 30 Mai 2020, alah sampai 9.631 sampel nan alah dipareso. Jadi rato-rato sampel nan dipareso satiok hari 803 sampel. Untuak rato-rato tu, fakultas FK Unand marupoan laboratorium tatatinggi nan mamareso di Indonesia.[13][15] Pancapaian tu mandapek apresisasi dek Kapalo BNPB, Doni Monardo. BNPB dalam rilis pers nyo manyabuikan nan dikarajoan dek Andani jo tim adolah kaba elok katiko bangsa ko sadang rusuah dek pandemi. Namo Andani dinilai layak dicatat sabagai ciek dari banyak pahlawan COVID-19.[2][16]
Kabanyakan urang nan kanai positif COVID-19 di Sumatra Barat adolah urang nan indak ado gajala atau disingkek OTG. Kasus iko babeda jo kasus nan di daerah lain nan banyak barasa dari pasien dalam pagawasan (PDP). Banyaknyo OTG nan disobokan nan positif koronavirus mambuek sumber panularan bisa dikatahui. Manuruik Andani, kondisi ko manunjukan upayo tracking nan dilakuan pamarintah berhasil, khususnyo dalam mamutuih mato rantai panularan.[14][17][18]
Sumatra Barat alah mandeteksi OTG katiko daerah lain masih bakutat mamareso PDP.[2] Sampai tangga 6 Juni 2020, presentase urang nan takonfimasi koronavirus di Sumatra Barat hanyo 25% dari PDP, sabalabiahnyo adolah OTG.[14] Identifikasi awal untuak urang OTG dipareso malalui pamaresoan polymerase chain reaction (PCR). Saketeknyo 24.000 dari 5 juta panduduak Sumatra Barat alah malakuan tes PCR. Rasionyo 0.43%, iko barado di ateh angko nasional nan masih 0.08%. Di Indonesia, Sumatra Barat mancatat angko paliang tinggi untuak rasio tes PCR jo jumlah panduduak.[2] Urang nan positif koronavirus di Sumatra Barat ditangani sacaro sistematis sahinggo indak manumpuak di rumah sakik. Presentase urang nan positif koronavirus nan dirawat di rumah sakik hanyo 16%, samantaro nasional mancapai 66%.[2][18]
Paran Laboratorium Infeksi Biomedik FK Unand sangaik dirasoan masarakaik Sumatra Barat di tangah pandemi ko. [14] Di tingkek nasional, laboratorium tu mamparoleh prestasi dalam kapasitas pamaresoan sampel untuak mandeteksi COVID-19. katiko laboratorium lain hanyo bisa manyalasaian 100 sampai 200 sampai dalam sahari, laboratorium tu bisa manyalasaian rato-rato 800 sampel sahari.[2]
Rujuakan
suntiang- ↑ "RS Unand - Direksi Rumah Sakit Universitas Andalas". rsp.unand.ac.id. Diakses tanggal 2020-06-08.
- ↑ a b c d e f g h i Ariansyah, Aldi. "Patriot Militan di Tengah Pandemi". BNPB (dalam bahasa Indonesia). Diakses tanggal 2020-06-07.
- ↑ "Direktori Dosen Unand". dosen.unand.ac.id. Diakses tanggal 2020-06-29.
- ↑ "Laboratorium Universitas Andalas Dapat Izin Kemenkes Uji Sampel Pasien Suspect Covid-19 di Sumbar". covesia.com (dalam bahasa Inggris). Diarsipkan dari versi asli tanggal 2020-04-12. Diakses tanggal 2020-06-29.
- ↑ "UPDATE: Bertambah, Sudah 7 Orang Dipastikan Terinfeksi Corona di Sumbar". www.harianhaluan.com. Diakses tanggal 2020-06-29.
- ↑ a b 17,1 Juta Penduduk Dunia Terkena TB. ugm.ac.id. 21 Juli 2016.
- ↑ padek (2020-08-07). "Dianugerahi Warga Teladan, Andani: Penghargaan bagi Tim Lab dan Medis". Padek.co (dalam bahasa Indonesia). Diakses tanggal 2020-10-18.
- ↑ "dr Andani Eka Putra Raih Penghargaan sebagai Tokoh Profesional dalam Ajang Indonesia Awards 2020". Padangkita.com (dalam bahasa Indonesia). 2020-10-07. Diakses tanggal 2020-10-18.
- ↑ Dahlan Iskan. Tirani Minoritas Archived 2020-06-09 di Wayback Machine. Radar Solo. 04 Mei 2020.
- ↑ a b Agency, ANTARA News. "Kiprah Laboratorium Biomedik Unand mengabdi di tengah pandemi COVID-19". Antara News Sumbar. Diakses tanggal 2020-06-08.
- ↑ "Laboratorium Universitas Andalas Dapat Izin Kemenkes Uji Sampel Pasien Suspect Covid-19 di Sumbar". covesia.com (dalam bahasa Inggris). Diarsipkan dari versi asli tanggal 2020-04-12. Diakses tanggal 2020-04-12.
- ↑ "UPDATE: Bertambah, Sudah 7 Orang Dipastikan Terinfeksi Corona di Sumbar". www.harianhaluan.com. Diakses tanggal 2020-04-12.
- ↑ a b Liputan6.com (2020-06-04). "Mengintip Kesibukan Tenaga Medis di Lab Unand Periksa Ribuan Spesimen Covid-19 Tiap Hari". liputan6.com (dalam bahasa Indonesia). Diakses tanggal 2020-06-08.
- ↑ a b c d "Kepala Labor Unand Sebut Sumbar Berhasil Putus Penularan Corona". Langgam.id (dalam bahasa Indonesia). 2020-06-05. Diakses tanggal 2020-06-07.
- ↑ "Universitas Andalas - Lab FK Unand Terbanyak Periksa Sampel Corona di Indonesia". www.unand.ac.id (dalam bahasa Indonesia). Diarsipkan dari versi asli tanggal 2020-06-08. Diakses tanggal 2020-06-08.
- ↑ "Kinerja Terbaik se-Indonesia, Gugus Tugas Nasional Apresiasi Dr. Andani dan Labor Unand". Langgam.id (dalam bahasa Indonesia). 2020-06-08. Diakses tanggal 2020-06-08.
- ↑ Agency, ANTARA News. "Peningkatan kasus positif COVID-19 di Sumbar pertanda baik, begini penjelasan ahli". Antara News Sumbar. Diakses tanggal 2020-06-08.
- ↑ a b "Penanganan Covid-19 di Sumbar Mirip Korsel, Diprediksi Berakhir Juli | Irwan Prayitno, Prof., Dr., Psi, Msc," (dalam bahasa Inggris). Diarsipkan dari versi asli tanggal 2023-03-30. Diakses tanggal 2020-06-08.