Abdul Wadud Karim Amrullah

Abdul Wadud Karim Amrullah marupokan adiak dari Haji Abdul Malik Karim Amrullah yang kalak labiah dikana jo

Abdul Wadud Karim Amrullah

panggian Buya Hamka. Abdul Wadud Karim Amrullah (AWKA) kamudian dikana jo panggian Willy Amrul. Hamka jo Awka adolah anak dari Haji Abdul Karim Amrullah yang dijuluaki Haji Rasul. Awka lahia pado 7 Juni 1927 di Kampuang Kubu, Sungai Batang,Maninjau, Agam di maso pamarintahan kolonial Balando.

Maso Ketek

Awka anak dari istri kaduo Haji Rasul yaitu Siti Hindun, inyo adolah kakak-baradiak samo Hamka tapi bedo amak. Awka sarupo jo anak nan lain, di maso ketek inyo tingga di kampuang, baraja di ruau, pai sakolah agamo di Padang Panjang nan dikalola oleh murid abaknyo. Innyo banyak mahabiskan waktu keteknyo di Maninjau jo Padang Panjang, babeda samo Hamka nan sajak dahulu marantau ka banyak nagari.

Maningganyo Abak

Pado 2 Juni 1945, Haji Rasul maningga di pangkuan Awka. Awka nan manuntun abaknyo manlafalkan kalimek syahadek katiko handak mahambusan napeh taakhirnyo. "Ambo nan malafazkan kalimek syahadek sabagai kato panghabisan diri ambo untuak malapeh abak" tulih Awka dalam otobiografinyo

Hiduik Baru Awka

Satalah wafaiknyo si Abak tahun 1945, Awka barangkek ka kota Rotterdam manjadi tukang di kapa MS Williem Ruys yang barangkek dari Tanjuang Pariuak pado Februari 1949. Lalu inyo malanjuikan jiduik barunyo di Amerika. Sempat pula tingga di Amerika Latin tahun 1950 sabalun akhirnyo mamutuihan untuak hiduik di San Fransisco, California. Di California, Awka mandirian Ikatan Masyarakat Indonesia (IMI) tahun 1962. Lalu nyo manikah jo Vera Ellen George, gadih Indo-Balando tahun 6 Juni 1970 dan punyo tigo urang anak. Nyo aktif pula dalam Islamic Center nan diasuah jo imigran Islam dari Indonesia sarato nagari-nagari Islam lainnyo di Los Angeles.

Baliak ka Indonesia dan Murtad

Tahun 1977, Awka, istri sarato anaknyo baliak ka nagari asal Indonesoa dan bakarajo di kantua Hasjim Ning di Bali. Bini Awka yang mulonyo alah muallaf akhianyo tapadayo samo kawan-kawan lamo sahinggo baliak ka agamo sabalunnyo yaitu Kristen dan mulai babarapo kali ka gareja. Bahkan sang bini maajak Awka untuak sato masuak ka agamo si bini sahinggo tajado riuah dalam rumah tanggo. Antah baa caritonyo, kamuko Awka murtad dari agamo Islam dan dibaptis oleh pihak gareja di kebayoran Baru Jakarta oleh Pandeta Gerald Pinkston.

Baliak ka Amerika dan Manjadi Pandeta

Satalah manjadi Kristen, Abdul Wadud Karim Amrullah mulai acok manggunokan namo Willy Amrull. Sabalunnyo namo iko lah acok juo dipakai samo Awka samanjak di lua nagari karano nampaknyo dianggap familiar samo budaya Baraik. Nampaknyo kato Willy diambiak dari padanan kato Wadud Karim lalu Amrull iolah singkekan dari kato Amrullah sahinggo namo Baraik nan dipakai Awka masih manyimpan jati diri khas Minang dan Islam namun manganduang ciri khas Baraik untuak Awka dapek ditarimo dalam komunitas lua.

Lalu di Amerika, Awka diangkek manjadi pandeta di Gareja Pekabaran Injil Indonesia (GPII). Sahinggo namo Willy Amrull labiah tanamo dek urang lua iolah saoran Pandeta Willy Amrull asal Sumatera nan labiah tapeknyo dari Ranah Minang.

Tanggapan Buya Hamka?

Sayangnyo Buya Hamka alah wafat sabalun itu sahinggo ulamo gadang kabanggaan ranah Minang dan Indonesia tu ndak basuo maso sang adiak nan samato wayangnyo alah batuka agamo. Hanyo basalang duo tahun sajak wafaiknyo Buya Hamka sang adiak Awka baganti agamo manjadi Kristen.

Kontroversi

Tahun 1998, ranah Minang dikajuikan oleh kaba salah sauran siswi MAN 2 dicilok, jilbabnyo dibuka, lalu dibaptis dan diperkosa namun saat dibaok ka pangadilan yang diadili hanyo kasus pamarkosaan sajo namun kasus gadih dicilok, pamasoan pindah agamo ndak ikuik dibaok ka ranah hukum. Gareja GPIB Padang manolak kalo talibek dalam kasus kriminal ko. Namo gadih tu ialah Wawah sahinggo nantinyo dikana jo Kasus Wawah dan pandeta nan malakukan itu namonyo iolah pandeta Willy.

Willy Amrull manyanggah sagalo fitnahan nan dituduahan padonyo. Willy Amrul manyabuik itu fitnahan untuak marusak citra dirinyo di Ranah Minang. Willy AMrull malakukan kagitan misionaris di Indonesia sajak tahun 1996 jo dukuangan misionaris Amerika dan aktif sangaik manyaban agamo Kristen di Ranah Minang. Basis pangikuiknyo di Jalan Batang Lembang (Padang), Parak Gadang (Padang). Pandeta Willy AMrull jo pangikuiknyo fokus samo anak-anak mudo Minang khususnyo kalangan ekonomi randah untuak dimurtadkan ka Kristen. Willy Amrull manyabuik iko adolah proses "pemuridan". Tangan kanannyo Yanuardi jo Salmon akhirnyo ikuik taseret Kasus Wawah. Akibaiknyo Willy Amrull ndak bisa datang lai dan katakuikan pulang kampuang.

Manuruik analisis Dr. Suryadi (dosen Universiteit Leiden - urang awak Piaman) bahwasanyo bisa jadi iko adolah caro urang awak Minang manyusun strategi supayo ndak tajadi Kristenisasi di Ranah Minang dan caro iko dapek ditiru untuak malakukan counter jiko ado upayo Kristenisasi Ranah Minang sabab Willy Amrull mangaku kalo nyo dijabak di kasus iko. Pandeta Willy Amrull sampaik manyureiki babagai lambago tinggi di Indonesia dan internasional untuak dapek manjalehan duduak parkaro Kasus Wawah iko namun indak mambuahan hasil.

Wafaik

Pandeta Willy Amrull akhirnyo wafaik pado tanggal 25 Maret 2012 di Los Angeles, ndak lamo satalah inyo manulis buku nan bajudul "Dari Subuh Hingga Malam: Perjalanan Seorang Putra Minang Mencari Jalan Kebenaran" nan dianggap sasuatu manggemparkan bagi Urang Minang. Dalam adaik Minang, sasaorang nan bapindah agamo dari Islam dianggap alah kalua dari Minang dan hak sarato kawajiban adaik indak balaku padonyo dan diangap pulo dibuang sapanjang adaik. dan info dari Museum Buya Hamka pun manegaskan bahwasanyo Awka atau Willy Amrull alah indak manjadi bagian dari urang Minang sahinggo inyo dibuang sapanjang adaik dari Nagari Sungai Batang. Kamudian hak-hak sosial maupun budayonyo dicabuik nan bararti Awka atau Willy AMrull bisa dikatokan alah bukan urang Minang lai sacaro adiak dan limbago.

Sajak Kasus Wawah tu, Willy AMrull ndak parnah baliak ka Indonesia sampai akhir hiduiknyo di Amerika. Hamka dan Awka/Willy Amrull punyo jalan masiang-masiang. Nan surang diingek sabagai ulamo gadang di Indonesia nan surang lai diingek sabagai pandeta asal Indonesia di akhia hiduiknyo.