Sulaman bayang

Sulaman Bayang adolah tamasuk jinih sulaman nan ado di Minangkabau. Sulaman Bayang ko asanyo dari Kanagarian Baruang-Baruang Balantai, Kacamatan Koto XI Tarusan, Kabupaten Pesisir Selatan, Provinsi Sumatra Barat.

Jinih Sulaman Bayang

Setidaknyo ado sekitar 40 jinih corak Sulaman Bayang ko. Biasonyo coraknyo tantang alam jo binatang. Contohnyo corak durian runtuah, kupu-kupu, jo bungo. Sulaman Bayang ko dipagunoan untuak sulaman baju kuruang, baju kebaya, baju koko, jo mukena.

Ciri-ciri Sulaman Bayang

Sulaman Bayang ko ciri-cirinyo adolah bagian dalam kain banangnyo mambantuak tusuak hias basilang. Caro menghiasnyo mambayang, tambuih pandang, sarato rantangan tusuak motifnyo mambayang di kain bagian lua.

Bahan Kain Sulaman Bayang

Kain nan dipakai untuak mambuek Sulaman Bayang ko bahannyo tipih, tambuih pandang, haluih, Janiah, jo warnanyo pun mudo.

Alat Mambuek Sulaman Bayang

Untuak mambuek Sulaman Bayang ko, paralu panjahik ketek jo gadang, guntiang ketek jo gadang, spidol warna sirah jo hitam, jarum pentul, banang sulam, karate karbon, jo karate minyak warna putih duo halai.

Caro Mambuek Sulaman Bayang

Mambuek Sulaman Bayang ko caronyo adolah dijahik tabaliak, sahinggo bayangnyo nampak. Yo ndak sambarang urang bisa mambuek Sulaman Bayang ko.

Harago Pakaian Sulaman Bayang

Sulaman Bayang ko babeda-beda, sasuai corak jo bahannyo. Baju kebaya Sulaman Bayang harago paling randah Rp750.000 sampai Rp1.000.000. Baju koko Sulaman Bayang haragonyo mulai Rp300.000 sampai Rp500.000. Baju kuruang Sulaman Bayang haragonyo mulai Rp350.000 sampai Rp750.000. Mukena Sulaman Bayang haragonyo mulai Rp750.000 sampai Rp1.500.000.