Rumah Gadang Karajaan Koto Besar

Rumah gadang karajaan Koto Besar adolah rumah adaik tradisional Minangkabau nan kapamiliakannyo punyo Karajaan Koto Besar. Rumah gadang iko balokasi di Nagari Koto Besar, Kecamatan Koto Besar, Kabupaten Dharmasraya, Provinsi Sumatera Barat. Rumah gadang iko pado kiniko marupoan sabuah situs cagar budaya nan barado di Kabupaten Dharmasraya. Rumah gadang tasabuik dibangun pado maso karajaan Pagaruyung dimano banyak tadapek karajaan-karajaan ketek pado wakatu itu nan barado di bawah naungan dari karajaan Pagaruyung.[1]

Lokasi suntiang

Rumah gadang karajaan Koto Besar iko barado di Jorong Koto Besar, Nagari Koto Besar, Kecamatan Koto Besar, Kabupaten Dharmasraya, Provinsi Sumatera Barat.[2] Lokasi bangunan tasabuik bajarak labiah kurang 30 km dari pusek Pamarintahan Kabupaten Dharmasraya nan barado di Pulau Punjung.[3] Bangunan iko talatak indak jauah dari jalan utamo Koto Besar sahinggo untuak manuju ka rumah gadang tasabuik bisa jo caranyo manggunoan kandaraan roda duo atau roda ampek. Sacaro geografis atau bentangan alamnyo, rumah gadang iko barado di dakek pamukiman penduduk dengan bantangan lahan datar. Sacaro umum topografi tanah di Kabupaten Dharmasraya tadiri ateh tigo bagian yaitunyo babukik- bukik, bagalombang, jo data dengan variasi katinggian dari 100 meter - 1.500 meter di ateh pamukaan lauik.[4][5]

Sijarah suntiang

Rumah gadang iko didirian dek dilatarbalakangi jo badirinyo sabuah karajaan nan banamo karajaan Koto Besar. Karajaan iko alah ado samanjak akhia abaik ka 17 masehi. Karajaan iko badiri di bakeh wilayah Kerajaan Melayu Dharmasraya.[6] Salain Koto Besar, tadapek babarapo karajaan ketek lainnyo di wilayah Dharmasraya yaitunyo karajaan Siguntur, Karajaan Sitiung jo Karajaan Padang Laweh. Tigo karajaan tasabuik badiri di pinggiaran sungai batang hari sadangkan karajaan Koto Besar barado di daerah nan indak bapusek di pinggiaran sungai batang hari.[7] [8] Lokasi dari badirinyo karajaan-karajaan tasabuik disabuik daerah rantau dalam konsep Minangkabau.[9] Karajaan-karajaan nan barado di daerah rantau tasabuik mampunyoi hubuangan kakarabatan jo karajaan Pagaruyung. Karajaan Koto Besar marupaoan salah ciek karajaan nan marupoan bagian dari karajaan Pagaruyung.[10]

Badirinyo karajaan Koto Besar didahului peristiwa sumpah terlarang. Katiko adiak dari Rajo Pagaruyung sangkek itu, Sutan Sari Alam Yang Dipertuan Jati, Puti Reno Langguak, mangalami panyakik kusta. Sipayo indak nio manula ka anggota karajaan lain, mako Puti Reno Langguak diasingan ka tapian sungai Lubuak Tajunjuang, nan indak jauah dari istano Karajaan Pagaruyung. Awa pangasiangan, katanyo, iyo lai diparahatian dek pihak karajaan jo caro manjanguak satiok wakatu. Namun, lambek laun, intensitas kunjuangan samakin lamo samakin manurun. Puti samakin marasoan kurangnyo simpati dari anggota keluarga. Pado akhianyo, inyo maraso tasisiah mako Puti Reno Langguak pai maninggaan tampek pangasiangan jo caro bajalan kaki manalusuri nagari-nagari dengan tujuan nan laum jaleh. Palarian Puti Reno Langguak didampiangi langsuang dek ampaek panghulu internal Karajaan Pagaruyung, yaitunyo Datuak Rajo Lelo, Datuak Rajo Sailan, Datuak Sampono, dan Datuak Rajo Mangkuto Alam.[1]

Dalam pajalanannyo, Puti banyak singgah di nagari-nagari nan dilewatinyo. Satiok pasinggahan, inyo salalu ditanyo dari maa asanyo dek panduduak satampek. Puti mangatokan inyo barasa dari kaluarga Karajaan Pagaruyung. Mandanga hal itu, banyak nan baempati, lalu mangikuti inyo ka mano pun malangkah, Sasudah cukuik banyak pangikuik, akhianyo rombongan Puti baranti di sakitar Nagari Koto Besar kiniko. Di sinan mereka manaruko, mambukak kampuang, untuak manjadikan pamukiman tetap. Lambek laun mereka bakambang biak, dan sairiang itu pulo panyakik kusta Puti barangsua cegak. Lalu didirikanlah karajaan di Koto Besar. Sasudah mandirian karajaan, Puti pun langsuang mamagang takhta. Tak hanyo itu, kerajaan tasabuik mandapek pangakuan dari karajaan-karajaan sakitar. Kabaradoan karajaan iko tacium dek Pagaruyung. Mangatahui Puti alah sehat dan juo alah mandirian karajaan, mako pihak Pagaruyung mandatangi Koto Besar untuak mangajak Puti untuak pulang ka Pagaruyung. Namun Puti indak amua pulang. Meski taruih dibujuak, Puti tetap indak amuah pulang. Lantaran habih kasabaran, tukas Dalpewan, Tuanku Sari Alam mangaluakan sumpah, jika pihak Puti hinggo katurunannyo nan padusi mangunjuangi Pagaruyung, mako akan mangalami sakik paruik nan barujuang kamatian. Mandapek sumpah itu, sambung Dalpewan, Puti mambaleh jo isi sumpah nan nyaris samo. inyo mambaco panji sumpah, kalau pihak Rajo hinggo katurunannya nan laki-laki mangunjuangi Koto Besar akan mati pulo nan diawali dek sakik paruik. Sumpah itu disaksian dek 4 datuak. Persumpahan tasabuik, disaksian urang tuo datuak 16 dari Kerajaan Koto Besar pado kala itu.[1]

Dari segi sijarah disabuikan bahwasanyo daerah iko pado maso-maso Karajaan Pagaruyung awa masih marupoan hutan belantara dan alum ado manusia nan tingga di situ. Kamudian salah saurang tokoh karajaan Pagaruyung karano sasuatu hal pai maninggaan karajaan jo pai bakelana sampai ka daerah Koto Besar iko. Tokoh tasabuik banamo Puti Langguk nan di daerah samulo hutan itu didirianlah sabuah rumah, jo Puti Langguklah nan partamo kali manampati rumah tasabuik. Sasudah itu lamo kalamoan panduduak daerah iko samakin banyak nan pado akhianyo badirilah Karajaan Koto Besar.[1]

Dengan badirinyo karajaan Koto Besar di wilayah Dharmasraya, mako disinan hadirlah sabuah pamarintahan nan di pimpin dek rajo. Karajaan Kota Besar nan juo marupoan bahagian dari karajaan pagaruyung tentu mampunyoi bantuak sistem pamarintahan nan samo. Dari sakian banyak parsamoan salah satunyo bantuak arsitektur bangunan. Bangunan nan tadapek di karajaan Koto Besar tasabuik di sabuik sabagai rumah gadang Koto Besar. Rumah gadang Koto Besar tasabuik mampunyoi bantuak nan samo jo rumah gadang lainnyo pado umumnyo. Salain itu fungsi dari rumah gadang itu sama pulo jo fungsi rumah gadang nan tadapek di wilayah Minangkabau yaitunyo bafungsi untuak bamusyawarah. Namun, hanya tadapek babarapo pabedaan dari segi bantuak dari rumah gadang tasbuik.[1]

Bangunan rumah gadang suntiang

Rumah Tuo Koto Besar, nan disabuik juo sabagai rumah gadang Koto Besar marupoan rumah adaik Minangkabau dengan ciri khasnyo barupo atok gonjong jo bapangguang. Atok rumah iko tabuek dari bahan seng bagonjong ampek sarato jo bangunan rumahnyo tabuek dari bahan kayu, dengan panggung baukuaran tinggi kurang labiah 1,35 m jo tonggak bajumlah 15 buah babantuak segi dalapan. Bangunan rumah babantuk ampek pasegi panjang jo sabuah pintu jo ampek buah jendela di bagian mungko. Adopun sisi–sisi nan lain marupoan dinding tatutuik. Pado bagian dalam ruangan marupoan ruangan nan tabukak tanpa ado panyakek dindiang atau biliak. Sacaro kasaluruahan, lueh dari lahan rumah gadang karajaan Koto Besat iko adolah 25 meter kali 30 meter, sadangkan lueh bangunan dalam hal iko rumah gadang tasabuik iolah 8 meter kali 12 meter. Bangunan rumah gadang iko barado di pemukiman panduduak. Disabalah utara jo salatan dari bangunan iko di batehi dek rumah-rumah panduduak jo di sabalah baraik dari bangunan iko tadapek lahan atau ladang punyo panduduak satempek, kamudian di sabalah timua dari bangunan tasabuik tadapek jalan desa Koto Besar. Bangunan rumah gadang tasabuik masih di fungsian sabagaimano fungsi samestinyo nan di pakai pada zaman dahulu, sabab Dari awa badirinyo bangunan, tampek iko digunoan sabagai tampek bamusyawarah jo mufakat. Tradisi iko masih dipatahankan sampai kiniko. Rumah gadang karajaan Koto Besar iko dimiliki dek suku caniago. Datuak sakaligus rajo dari Koto Besar iko manjadi pimpinan pangalolaan rumah gadang tasabuik. Kiniko, salain karajaan Koto Besar, rumah gadang tasabuik juga di bantu jo di kelola dek BPCB Sumbar jo Pamerintah Daerah Kabupaten Dharmasraya.[1]

Pawarih rumah gadang suntiang

Pado maso kiniko nan manjadi rajo di karajaan Koto Besar iolah Sutan Riska Tuanku Kerajaan sakaligus nan mawarisi pucuak pimpinan rumah gadang karajaan Koto Besar. Baliau mawarisi gala Yang di Pertuankan Sri Maharaja Diraja.[11] Sutan Riska malakukan sabuah gebrakan nan indak pernah dilakuan dek pamangku adaik sabalumnyo, yaitunyo manjalin kambali hubuangan kekerabatan nan sempat putuih salamo ratuihan tahun dengan pihak pewaris Kerajaan Pagaruyung. Panjalinan baliak hubuangan kadua pawarih karajaan iko dilakukan malalui upacara “maungkai sumpah, mambukak kabek” atau pancabutan sumpah talarang antaro pandiri Karajaan Koto Besar Tuan Puti Langguk jo Rajo Pagaruyung kala itu, Sutan Sahih Alam untuak indak mangunjuangi satu samo lain sampai wakatu nan indak ditantuan.[7] Pancabutan sumpah talarang tasabuik, dilakuan pado tanggal 25 Mei 2013 di kadiaman pamangku adaik Karajaan Koto Besar, nan dihadiri dek pawarih karajaan di kaduo balah pihak jo babarapo pawakilan dari pawarih karajaan-karajaan di wilayah adaik Minangkabau, sarupo Abdul Haris Tuanku Sati dari Karajaan Pulau Punjung, Sutan Hendri Tuanku Bagindo Ratu dari Karajaan Siguntur, Sutan Alif Tuanku Bagindo Muhammad dari Karajaan Padang Laweh. Zulkarnaen Tuanku Rajo Disambah dari Karajaan Sungai Pagu, jo Tuanku Rajo Firman dari Karajaan Jambu Lipo.[12][13][14]

Rujuakan suntiang

  1. a b c d e f "Sistem Registrasi Nasional Cagar Budaya". cagarbudaya.kemdikbud.go.id. Diarsipkan dari versi asli tanggal 2020-06-20. Diakses tanggal 2020-09-14. 
  2. "Ibukota Dharmasraya Terus Persolek Diri - Pemerintah Kabupaten Dharmasraya". Pemerintah Kabupaten Dharmasraya Tau Jo Nan Ampek. Diarsipkan dari versi asli tanggal 2020-06-19. Diakses tanggal 2020-09-14. 
  3. "Profil - Pemerintah Kabupaten Dharmasraya". Pemerintah Kabupaten Dharmasraya Tau Jo Nan Ampek. Diarsipkan dari versi asli tanggal 2020-11-21. Diakses tanggal 2020-09-14. 
  4. "Pemeritah Kabupaten Dharmasraya". dharmasrayakab.go.id. Diarsipkan dari versi asli tanggal 2020-08-19. Diakses tanggal 2020-09-14. 
  5. "Topografi - Pemerintah Kabupaten Dharmasraya". Pemerintah Kabupaten Dharmasraya Tau Jo Nan Ampek. Diarsipkan dari versi asli tanggal 2020-11-18. Diakses tanggal 2020-09-14. 
  6. Istiawan, Budhi (2011). Menguak Tabir Dharmasraya,. Batusangkar: BPPP Sumatera Barat. pp. 8-12. 
  7. a b Ajisman, Efrianto (2010). Sejarah Kerajaan-Kerajaan di Dharmasraya,. Padang: BPSNT Press. pp. 84. 
  8. "Inilah Sejarah Kerajaan Pagaruyuang yang Belum Kamu Ketahui - Minangkabaunews". minangkabaunews.com (dalam bahasa Indonesia). Diarsipkan dari versi asli tanggal 2020-06-19. Diakses tanggal 2020-09-15. 
  9. Sedjarah Minangkabau. Jakarta: Bhratara. 3 Maret 1970. pp. 3. 
  10. Politik Representasi Istana Basa Pagaruyung sebagai Identitas Minangkabau di Sumatera Barat. Bali: Program Studi Kajian Budaya Program Pasca Sarjana Universitas Udayana. 3 Maret 2011. pp. 378. 
  11. "Catatan Dari Seminar Ekspedisi Pamalayu: Berdamai Dengan Sejarah". Berdikari Online (dalam bahasa Indonesia). 2020-01-14. Diakses tanggal 2020-09-15. 
  12. "Google Kumpulan". groups.google.com. Diakses tanggal 2020-06-18. 
  13. "Arsip Lembaran Daerah Provinsi Sumatera Barat. Peraturan Daerah Nomor 13 Tahun 2000 tentang Pemerintahan Naga" (PDF). webcache.googleusercontent.com. Diarsipkan dari versi asli (PDF) tanggal 2020-06-21. Diakses tanggal 2020-06-18. 
  14. "Sumpah nenek moyang puti lungguak". Diakses tanggal 15 September 2020.