Rokok atau panduduik adolah tabuang dari karateh baukuran panjang antaro 70 inggo 120 mm (bavariasi tagantuang nagara) jo diameter sakitar 10 mm nan barisi daun-daun timbakau kariang nan alah dicancang. Rokok dibaka pado salah satu ujuangnyo dan dipadiakan mambaro supayo asoknyo dapek diisok lewaik muluik pado ujuang nan lain.

Duo batang rokok.

Rokok biasonyo dijua dalam bungkusan babantuak kotak atau kemasan karateh nan murah dimasuakan ka dalam saku. Sajak babarapo taun tarakhia, bungkuih-bungkuih rokok ko alah disaratokan jo pasan-pasan kasehatan nan maagiah tau parokok bahayo rokok untuak kasihatan, misanyo kanker paru atau sarangan jantuang (walaupun nyatonyo pasan ko acok diabaian).

Manusia nan partamo kali dikataui marokok adolah urang Indian Amerika, untuak urusan ritual sarupo pamujaan dewa atau roh. Pado abaik ka-16, katiko banso Eropa manamukan banua Amerika, sabagian dari panjalajah-panjalajah Eropa tu ikuik mancubo-cubo maiisok rokok dan kudian mambaok timbakau ka Eropa. Kudian kabiasoan marokok lah mulai muncua di kalangan bangsawan Eropa. Tapi babeda jo banso Indian, marokok di Eropa anyo untuak kasanangan samato. Abaik ka-17 padagang-padagang Spanyol masuak ka Turki dan wakatu tu kabiasoan marokok mulai masuak ka nagari-nagari Islam.

Manuruik riset, 51,1 persen rakyaik Indonesia adolah parokok aktif dan tatinggi di ASEAN. Hal ko amaik jauah babeda jo nagara-nagara tatangga, misanyo Brunei Darussalam 0,06% jo Kamboja 1,15%. Pado taun 2013, 43,8% parokok barasa dari golongan ekonomi lamah; 37,7% parokok anyo mampunyoi ijazah SD; patani, nalayan, jo buruh mancakuik 44,5% parokok aktif. 33,4% parokok aktif baumua di antaro 30 inggo 34 taun. Rancaknyo anyo 1,1% padusi Indonesia adolah parokok aktif, walaupun tantunyo parokok pasif ka labiah banyak.[1]

Alah banyak riset nan mambuktian baso rokok amaik manimbulan katagantuangan, di sampiang manyababan banyak tipe kanker, panyakik jantuang, panyakik panapasan, panyakik pancernaan, efek buruak untuak kalahiran, jo emfisema.[2][3]

Rujuakan suntiang