Achmad Mochtar
Prof. Dr. Achmad Mochtar (lahia di Ganggo Hilia, Bonjol, Pasaman, Sumatera Barat, taun 1892 – maningga di Jakarta, 3 Juli 1945 pado umua 53 taun) adolah saurang dotor jo ilmuwan Indonesia [1][2] Inyo marupoan urang Indonesia partamo nan manjabaik direktur Limbago Eijkman, sabuah limbago panelitian biologi di Jakarta nan didirian pado maso panduduakan Balando.[3]
Achmad Mochtar | |
|---|---|
 Achmad Mochtar, indak batahun. | |
| Lahia | 1892 |
| Maningga | 3 Juli 1945 (umua 53) |
| Kabangsaan |  Indonesia |
| Alma mater | - Stovia, Batavia - Universitas Amsterdam, Balando |
| Karojo | Dotor |
| Dikana dek | Direktur Indonesia partamo Limbago Eijkman |
| Urang tuo | Omar (apak) Roekajah (amak) |
Pado maso panduduakan Japang, panaliti di Limbago Eijkman ditangkok dek militer Japang ateh tuduahan pancemaran vaksin tetanus.[2] Meski tuduahan tasabuik indak pernah tabukti, Achmad Mochtar manyarahan diri pado tantara Japang jo kamudian dieksekusi mati demi manyalamaikan hiduik para panaliti di limbago nan dipimpinnyo.[1][4]
Kabaradoan jasadnyo nan dikubuaan massal basarato babarapo urang lainnyo baru dikatahui talatak di Ereveld, Ancol pado taun 2010, satalah basalang 65 taun.[4]
Lata balakang suntiang
Achmad Mochtar marupoan saurang Minangkabau nan lahia dari pasangan Omar jo Roekajah.[5] Inyo luluih dari sikolah kadotoran STOVIA di Batavia pado taun 1916.[1]
Karajo suntiang
Mochtar mamulai karajonyo sabagai dotor di desa tasuruak Panyabungan, Sumatera Utara salamo duo taun.[1] Kutiko batugas di Panyabungan, Achmad Mochtar batamu jo panaliti bakabangsoan Balando banamo W.A.P Schüffner nan maso itu sadang manaliti malaria.[1] Schüffner kamudian manjadi mentor bagi Achmad Mochtar.[1] Barkat pangaruah Schüffner, pamarentahan kolonial Balando mangirim Achmad Mochtar untuak maikuki program doktoral di Universitas Amsterdam.[1]
Disertasi nan disalasaiannyo pado taun 1927 manyangkal leptospira sabagai panyabab damam kuniang, sabagaimano nan dikatahui ilmu kadotoran pado maso itu.[1] Achmad Mochtar kumbali ka Hindia Balando pado taun 1927 jo malanjuikan panalitian tantang leptospirosis.[1] Mochtar bapindah-pindah tampek tingga dari Bengkulu, Sumatera Barat, hinggo Semarang. Inyo aktif mahasiaan karya ilmiah nan dipublikasian di babagai jurnal tanamo.[4] Pado taun 1937, inyo bagabuang jo limbago panalitian The Central Medical Laboratory nan sataun kamudian baganti namo manjadi Limbago Eijkman.[1] Pado taun 1942, Japang manduduaki Indonesia jo manangkok urang-urang bakabangsoan Balando, tamasuak direktur Limbago Eijkman pado maso itu nan banamo W.K. Martens. Martens maningga akibaik beri-beri saaik barado dalam panyekapan militer Japang.[1] Dek karano itu, Achmad Mochtar diangkek manjadi pamimpin Limbago Eijkman jo marupoan urang Indonesia partamo nan manduduaki jabatan tasabuik.[1]
Tuduahan pancemaran vaksin tetanus suntiang
Pado taun 1942, tantara Japang mamarentahan Limbago Pasteur di Bandung untuak mamproduksi vaksin untuak maubekan romusha nan didugo tasarang tetanus.[1] Sakitar 90 urang romusha nan masih sehat dibao ka rumah sakik pusek di Jakarta untuak mandapekan vaksin tasabuik, namun sadoalahnyo maningga dunie. Babarapo minggu kudian, panaliti Limbago Eijkman nan manganalisis sampel jaringan hasia otopsi manyimpulan baso vaksin nan diagiahan alah tacemar toksin tetanus.[1]
Pado bulan Oktober 1944, Achmad Mochtar basarato staf panaliti Lembaga Eijkman jo para tanago kasehatan nan malakuan vaksinasi ditangkok dek tantara Japang Kenpeitai jo tuduahan malakuan sabotase tahadok vaksin nan diagiahan kapado paro romusha.[1] Inyo sadoalahnyo disekap, ditokok, dibaka, jo disikso jo metode waterboarding.[1] Babarapo dotor tewas dalam tahanan.[1]
Kamatian suntiang
Pado bulan Januari 1945, para panaliti Limbago Eijkman nan salamaik dari siksoan tantara Japang dibebaskan.[1] Tigo laporan tapisah manyebuikan Achmad Mochtar banegosiasi jo para panyekapnyo, di mano inyo satuju untuak mangakui tuduahan sabotase bilo para koleganyo dilapehan.[1] Achmad Mochtar dipancuang pado tanggal 3 Juli 1945. Sabuah catatan harian tantara Japang manyabuikan baao janazah Achmad Mochtar dihancuaan jo masin gilas uok jo dibuang ka liang kuburan massal.[1]
Panamuan makam Achmad Mochtar pado taun 2010 suntiang
Sajak saaik kamatiannyo pado taun 1945, lokasi janazah Achmad Mochtar indak pernah dikatahui.[1] Malalui investigasi nan dilakuan dek panaruihnyo, Direktur Limbago Eijkman, Sangkot Marzuki, jo koleganyo, Kevin Baird, barasia manamuan makam Achmad Mochtar di Ereveld, Ancol pado taun 2010.[1] Jasad Achmad Mochtar dimakamkan dalam ciek liang lahat basamo 9 urang lainnyo.[1]
Pangharagoan suntiang
Untuak maharagoi jaso Achmad Mochtar, Pamarentah Indonesia maagiahan pangharagoan Satya Lancano Kabaktian Sosial pado taun 1968 jo tando kahormatan Bintang Jaso Klas III. Salain itu, namonyo digunoan manjadi namo rumah sakik miliak Pamarentah Provinsi Sumatera Barat, iyolah Rumah Sakik Umum Daerah Dr. Achmad Mochtar Bukittinggi.[6]
Rujuakan suntiang
- ↑ a b c d e f g h i j k l m n o p q r s t u v w (Inggirih)Stone R (2010). "Righting a 65-year-old wrong". Science. 329 (5987): 30–31.
- ↑ a b (Inggirih) Achmad Mochtar Scientiest Heroic Sacrifice The Guardian, 2010/07/25. diakses 23 November 2014
- ↑ (Indonesia) Eijkman Peringati 65 Tahun Kematian Tragis Achmad Mochtar Detik.com, 2010/07/03. diakses 21 November 2014
- ↑ a b c (Indonesia) Ilmuwan Achamd Mochtar Rela Mati Demi Selamatkan Stafnya Archived 2014-11-29 di Wayback Machine. Tempo.co, 2010/08/03. diakses 21 November 2014
- ↑ Majalah Tempo, Seorang Martir Bernama Achmad Mochtar, 29 Juni - 5 Juli 2015
- ↑ "Sejarah RSAM-RS. Dr. Achmad Mochtar Bukittinggi" Archived 2016-03-06 di Wayback Machine. Situs web resmi RSUD Dr. Achmad Mochtar Bukittinggi. 2 Januari 2012. Diakses 1 Maret 2016.