Candi Muaro Takuih

pra=https://min.wikipedia.org/wiki/Berkas:COLLECTIE_TROPENMUSEUM_Een_steen_met_inscripties_uit_de_Candi_Bungsu_op_het_tempelcomplex_Candi_Muara_Takus_TMnr_10016240.jpg|ka|jmpl|Batu tulih dari Candi Bungsu di Muaro Takuih Candi Muaro Takuih adolah situs candi Buddha nan talatak di Desa Muaro Takuih, Kecamatan XIII Koto, Kabupaten Kampar, Riau, Indonesia. Situs iko bajarak kurang labiah 135 kilometer dari Kota Pakanbaru.

Situs Candi Muaro Takuih dikaliliangi dek tembok baukuran 74 x 74 meter, nan tabuek dari batu putiah jo tinggi tembok ± 80 cm, di lua arealnyo adopulo tembok tanah baukuran 1,5 x 1,5 kilometer nan mangaliliangi kompleks situs ko sampai ka tapian Batang Kampar Kanan. Di dalamnyo ado babarapo bangunan candi nan banamo Candi Suluong/Tuo, Candi Bungsu, Maligai Stupa, jo Palangka.

Ahli-ahli purbakal alun dapek manantukan sacaro tapek maso situs candi iko didirikan. Ado nan manyabuik abaik ka-4, ado pulo nan manyabuik abaik ka-7, abaik ka-9, bahkan abaik ka-11. Namun candi iko dianggap alah ado pado zaman kaamehan Sariwijaya, sainggo babarapo sijarawan maanggap kawasan ko sabagai salah satu pusek pamarintahan dati karajaan Sariwijaya.

Pado taun 2009 Candi Muaro Takuih dicalonkan untuak manjadi salah satu Situs Warisan Dunia UNESCO.

Deskripsi situs

Candi Muaro Takuih adolah situs candi paliang tuo di Sumatera, nan juo satu-satunyo situs paninggalan sijarah nan babantuak candi di Riau. Candi nan bacorak Buddhis iko marupokan bukti baso agamo Buddha panah bakambang di kawasan iko.

Candi iko tabuek dari batu kasiak, batu sungai, jo batu bata. Babeda jo candi nan ado di Jao, nan tabuek dati batu andesit nan diambiak dari pagunuangan. Bahan pambuek Candi Muaro Takuih, khususnyo tanah liek, diambiak dari sabuah kampuang nan banamo Pongkai, lataknyo kurang labiah 6 km di sabalah ilia situs Candi Muaro Takuih. Namo Pongkai kamungkinan barasa dari bahaso Cino, Pong aratinyo lubang jo Kai aratinyo tanah, sainggo dapek diaratian lubang tanah, dek sabab panggalian untuak pambangunan candi. Bakeh lubang galian tu kini alah tabanam jo aia banduang PLTA Koto Panjang.

Bangunan utamo di kompleks ko adolah sabuah stupa nan gadang babantuak minaro nan sabagian gadang tabuek dari batu bata jo sabagian lainnyo batu kasiak kuniang. Di dalam situs candi ko ado bangunan candi nan disabuik Candi Tuo, Candi Bungsu, Stupa Mahligai, sarato Palangka. Salain bangunan tasabuik, ado pulo gundukan nan dipakirokan sabagai tampek mambaka tulang manusia. Samantaro di lua situs ko ado pulo bangunan-bangunan bakeh nan tabuek dari batu bata nan alun dapek dipastikan jinih bangunannyo.

Rujuakan

Daftar Pustaka

• (Indonesia) Balai Arkeologi Medan. 1998. Berkala Arkeologi SANGKHAKALA.
• (Indonesia) Departemen Pendidikan dan Kebudayaan. 1996. Hasil Pemugaran dan Temuan Benda Cagar Budaya PSP I. Proyek pembinaan Peninggalan Sejarah dan Kepurbakalaan Pusat. Jakarta
• (Indonesia) Haryono, Timbul. 1986. Relief dan Patung Singa Pada Candi-Candi Periode Jawa Tengah: Penelitian Atas Fungsi dan Pengertiannya. Laporan Penelitian. Yogyakarta
• (Inggirih) Kempers, A. J. Bernet. 1959. Ancient Indonesian Art. Cambridge, Massachusetts: Harvard University Press
• (Indonesia) Siagian, Renville. 2002. CANDI sebagai warisan seni dan budaya Indonesia. Yogyakarta: Yayasan Cempaka Kencana
• (Indonesia) Soekmono, R. 1974. Candi, Fungsi dan Pengertiannya. Disertasi. Jakarta
• (Indonesia) Suaka PSP Prov. Sumbar dan Riau. 1995. Buletin Arkeologi AMOGHAPASA. Batusangkar